Азийн хөлбөмбөгийн холбооны “President’s Cup”-ийн сонгон шалгаруулах тэмцээний “А” хэсгийн тоглолт Пакистаны Лахор хотод боллоо. Шигшээ тэмцээнд оролцох хоёр эрхийн төлөө 2011 оны Пакистаны “Премьер лиг”-ийн аварга KRL (Kahuta Reserch Laboratories Football Club), Тайванийн лигийн аварга “Taiwan Power Company”, Монголын Супер цомын эзэн “Эрчим” хүч үзсэн. Д.Батнасан дасгалжуулагчтай “Эрчим” Монголын клубүүдээс тивийн хэмжээний тэмцээнд анхлан оролцож, анхны оноог авчрав.

Монголын Үндэсний лигийн зургаан удаагийн аваргууд эхний тоглолтоо талбайн эзэн “KRL”-тэй хийж 0:0-ээр тэнцсэн. “Эрчим” дараа нь 2011 оны “President’s Cup”-ийн аварга “Taiwan Power Company”-д 0:1-ээр дийлдсэнээр шигшээ тэмцээнд оролцож чадах эсэх нь тун ч эргэлзээтэй болсон билээ. Эсрэг багийн хамгаалагч Чен И Вей тоглолтын эцсийн буюу 90+3 дахь хоромд ялалтын бөмбөгийг хийсэн нь харамсалтай. Бүхнийг шийдэх сүүлчийн тоглолтод Пакистан, Тайванийн аваргууд хуурай тэнцсэнээр “Эрчим” хэсгээсээ шалгарч чадсангүй.

“President’s Cup”-ийн шигшээ тоглолт есдүгээр сарын 24-30-нд болох бөгөөд “Taiwan Power Company”, “KRL”-ээс гадна Киргизстаны “Дордой Бишкек”, Тажикистаны “Истиклол”, Палестинийн “Марказ Шабаа Аль-Ам ари”, Камбожийн “Phnom Penh Crown” эрхээ авчээ.