“Шарын гол” ХК анхдагч зах зээлд нэмж хувьцаа гаргах болсныг Санхүүгийн зохицуулах хороо зөвшөөрчээ. Компани Монголын хөрөнгийн захаас 17.7 тэрбум гаруй төгрөгийн хөрөнгө татах юм. Олон нийтэд санал болгох энгийн хувьцааныхаа тоог ийнхүү нэмэгдүүлснээр нийт 10.231.389 ширхэг хувьцаатай болж буй. Нэмэлт хувьцаагаа эхний ээлжинд компанийн хувь нийлүүлэгчдэд худалдахаар санал болгоно. Тус компанийн томоохон хувьцаа эзэмшигчид нь “Файрбөрд глобал мастер фанд”, “Файрбөрд глобал мастер фанд II”, “Файрбөрд Монголиа фанд”, “Шарын гол Энерго”, “Могул ресорсиз” ХХК юм.

Шарын голын уурхайг 1962 онд байгуулж, төрийн өмчид байсныг 2003 онд хувьчилж байжээ. 1498 дугаартай ашиглалтын тусгай зөвшөөрөл нь 16 мянган га талбайг хамардаг. 50 шахам жилийн түүхтэй тус уурхайг АНУ-ын “Firebird” компани хувьчилж авсан. Хагас коксжуулсан нүүрсийг дотоод, гадаадын зах зээлд нийлүүлдэг.Төмөр замын төв шугамд холбогдсон тул Орос, Хятадаар дамжуулан зүүн өмнөд Азийн орнууд болон Япон, Солонгосын зах зээлд нүүрсээ нийлүүлэх боломжтой. Тиймээс төмөр замд холбогдоход 65 км төмөр замын төслийг хэрэгжүүлэх гэж байгаа. Үйлдвэрлэлээ өргөжүүлэх шинэ хөтөлбөр хэрэгжүүлж эхэлсэн бөгөөд ингэснээр 0.5-1.0 сая тонн хүртэл нүүрс нэмж олборлодог болох  аж.