“Шинэ дэлхий” телевиз “Тэнгэр трейвэл”-ХХК-тай хамтран “Та яг одоо аялмаар байна уу” шоу нэвтрүүлгийг зохион байгуулж байгаа аж. Нэвтрүүлгийг бэлтгэх тухайн өдөртөө л ялагчаа тодруулж, үнэгүй аялах боломж олгодог уг шоу нэвтрүүлгийн хамтран зохион байгуулагч “Тэнгэр трейвэл” ХХК-ийн захирал Б.Санжидмаатай ярилцлаа.

-Энэхүү шоу нэвтрүүлгийн гол зорилго нь юу вэ?

-“Шинэ дэлхий” телевизтэй хамтран “Та яг одоо аялмаар байна уу” шоу нэвтрүүлгийг өнгөрсөн 4-р сараас эхлэн цаашдаа бүтэн нэг жилийн хугацаанд зохион байгуулахаар төлөвлөсөн. Үүнийг бид ард түмний шоу гэж нэрлэж байгаа юм. Манай нэвтрүүлэг нь богино хугацаанд ялагч тодруулдгаараа онцлогтой. Гурваас дөрвөн цагийн хугацаанд ялагч тодорч байгаа. 30 гаруй хүний бүрэлдэхүүнтэй уг шоу нэвтрүүлэгт хэн ч оролцох боломжтой бөгөөд бид оролцогчоо хаанаас ч сонгоно. Гэхдээ бид гурван багт хуваагдан оролцогчдоо олж, уралдуулж байгаа. Ялсан нь аялах эрхтэй болж байгаа юм.

-Оролцогч ялагч болохын тулд ямар нэгэн даалгавар биелүүлэх үү?

-Үндсэн гурван даалгаврыг биелүүлнэ. Хамгийн эхнийх бол оролцогчийн гадаад паспорт нь бэлэн байх ёстой. Дараагийнх нь аялалын бэлтгэлийг базаасан байх ёстой. Харин гуравдахь нийгмийг төлөвшүүлэхэд жирийн иргэдийн оролцоо ямар байх ёстой талаар даалгавар байгаа.

-Ялагч ямар орнуудаар аялж байгаа вэ?

-Манай компанийн үндсэн 50 гаруй чиглэлийн тодорхой хэсгээс нь сонгох боломжтой байгаа юм.

-Энэ нэвтрүүлэг хэдий хугацаанд үргэлжлэх вэ. Хэдэн ялагч тодруулах вэ?

-Нэг жилийн хугацаанд үргэлжилнэ. Эхлээд сар гаруй хугацаа өнгөрч байгаа бөгөөд хоёр ч ялагч тодроод эхнийх нь Бээжин Утай Хөх хот чиглэлийн аялалд яваад ирээд байна. Цаашдаа Хайнан ,Дубай, Чежү гээд олон сонирхолтой аялалд үнэгүй явах ялагчдыг тодорно. Нийтдээ 14 ялагчийг тодруулна.

-Зөвхөн Нийслэл хотноо зохион байгуулах уу?

-Энэ удаад Улаанбаатар хотноо зохион байгуулна. Цаашид хөдөө орон нутгаар зохион байгуулах төлөвлөгөөтэй байгаа. Дашрамд дурдахад “Шинэ дэлхий” телевизээр долоо хоног бүрийн баасан, бямба гаригийн оройны 22:00 цагаас ялагчдын талаар тогтмол нэвтрүүлэг гарч байгаа. Энэхүү нэвтрүүлгээс манай шоуны талаар дэлгэрэнгүй мэдээлэл авч болох юм.

Шоу нэвтрүүлгийн анхны ялагч “Автобус нэгдэл” ХХК-ийн инженер Г.Доржжигжидтэй уулзсан юм. Тэрбээр сэтгэл өндөр байгаагаа илэрхийлсэн юм.

-Юуны өмнө азтан болсонд баяр хүргэе. Яагаад азтан болов?

-Баярлалаа. Ард кинотеатрын буудалд сууж байтал “Шинэ дэлхий” телевизийн сурвалжлагч нар ирээд ирээд “Та яг одоо аялмаар байна уу” гэж асуусан. Би “тийм ээ л” гэсэн. Тэгээд даалгавруудыг нь гүйцэтгээд түрүүлсэн. Тэгээд л ялагч боллоо.

-Хамгийн хэцүү даалгавар нь юу байсан бэ?

-Гудамжинд арван эмэгтэй хүнээр үнсүүлэх нь хамгийн хэцүү байсан.

-Та яг үнэгүй аялуулна гэхээр итгэж байсан уу?

– Эхэндээ ч их гайхч үнэмшихгүй байсан, харин “Шинэ дэлхий” телевиз, “Тэнгэр трейвэл” ХХК –аас хамтран жирийн ард иргэдэд тэр бүр олдохгүй ийм сайхан боломж олгож байгаад маш их баярлаж байна.

-Аялал ямар байсан бэ?

– Өө их сайхан байсан, миний амьдралд дурсагдах их сайхан баярт үйл явдал болсон гэж их баяртай байна. Нэмж хэлэхэд “Шинэ дэлхий” телевизийн сурвалжлагын баг их шуурхай, бас чадварлаг найрсан санагдсан, та нартаа их баярласан шүү гэдгийг дахин хэлмээр байна.