Афганы энхтайвны төлөө чухал үүрэг гүйцэтгэж явсан ахмад зүтгэлтэн Кабул хотод буудуулж, амь насаа алджээ. Арсала Рахмани нь нэгэн цагт Талибаны сайдын алба хашиж байсан бөгөөд Афганистаны Энхтайвны дээд зөвлөлийн гол гишүүдийн нэг байв. Тус зөвлөл нь Талибантай энхтайвны хэлцэл байгуулахын төлөө байгуулагдсан цагаасаа хойш идэвхтэй оролдлого хийсээр байгаа ажээ. Өнгөрсөн жил мөн тус зөвлөлийн тэргүүн амиа золиослогч алан хядагчийн гарт өртөж, нас барсан бөгөөд түүний хүү, АНУ-д боловсрол эзэмшсэн гэх Салахуддин Раббани нь өнгөрсөн сард эцгийнхээ албан тушаалд томилогджээ.

Арсала Рахманигийн тухайд ням гаригийн өглөө буудуулж, амиа алдсан тухай Афганистаны цагдаагийн байгууллага мэдээлжээ. Тэрээр Кабул хотын баруун хэсэгт ажилдаа явах замдаа буудуулсан гэнэ. Түүн рүү халдсан хүмүүс “Toyota Corolla” маркийн суудлын тэрэгтэй явж байсан, дуу намсгагчтай буугаар ердөө ганц удаа буудсан тухай Кабул дахь BBC-гийн сурвалжлагч Билал Сарвари мэдээлсэн байна. Урьд өмнө нь түүний амь насанд заналхийлсэн, дарамталж сүрдүүлсэн тохиолдол нэг бус удаа гарч байсан атал ямар учраас зэвсэглэсэн бие хамгаалагчгүй явж байсан нь түүнийг дэмжигчдийн гайхлыг төрүүлж буй гэнэ.

Талибанчууд 2001 он хүртэл Афганистаныг эрхэндээ байлгах таван жилийн хугацаанд тэрээр Талибаны төрийн эрхэнд, Боловсролын сайдын алба хашиж байжээ.