Монголын кино бүтээгчид өчигдөр /V.12/ шилдгүүдээ шалгарууллаа.  Кино урлагийн шилдгийн шилдэг бүтээл, уран бүтээлчдийг шалгаруулах “Academy Awards 2012” наадам Улсын драмын эрдмийн театрт болсон юм. Тус наадамд 2011 оны нэгдүгээр сарын 1-нээс энэ оны тавдугаар сарын 1-нийг хүртэлх хугацаанд бүтээж, дэлгэцнээ гаргасан 15 киног 18 номинацид өрсөлдүүлсэн юм.  Шалгаруулалтад “Wisdom Film” продакшн, найруулагч Ж.Сэнгэдоржийн бүтээл “Бодлын хулгайч” кино таван номинацийн эзэн болж, шилдгийн шилдэг кинонд олгосон Гран-при шагнал, таван сая төгрөгийн эзэн болсон юм.

Монголын кино урлагийн салбарт өнгөрсөн жил 40 гаруй дэлгэцийн бүтээл төрж, үзэгчдийн хүртээл болсон ч наадамд 15 кино 16 номинацид өрсөлдлөө. Хэдийгээр энэ удаагийн наадам 18 номинациар шилдгүүдээ тодруулахаар товоо зарлаад байсан ч “Шилдэг эмэгтэй гол дүр”-д “Нэг биеийн хоёр зүрх” киноны гол дүрээр дуучин Хулан, “Шилдэг инээдмийн кино” номинацид “Миний ахын эхнэр” кино нэр дэвшиж, өрсөлдөх өөр бүтээл ирээгүй тул дээрх хоёр номинацийн эзнийг тодруулаагүй юм. 

“Academy Awards 2012” наадмын ерөнхий шүүгчээр Төрийн соёрхолт кино найруулагч, Урлагийн гавьяат зүтгэлтэн Б.Балжинням болон шүүгчээр Ардын жүжигчин, Урлагийн гавьяат зүтгэлтэн Б.Мөнхдорж, Төрийн шагналт хөгжмийн зохиолч Б.Мөнхболд, Кино зураглаач Б.Лхагвасүрэн, кино найруулагч Б.Ганболд, Соёлын тэргүүний ажилтан, зураач Т.Гоош нар ажиллажээ.

“Academy Awards-2012” наадмаас шалгарсан шилдгүүд:

1. Шилдэг эрэгтэй дүр: Б.Амарсайхан “Бодлын хулгайч”
2. Шилдэг эрэгтэй туслах дүр: Ц.Цэрэнболд “Богд хаан”
3. Шилдэг эмэгтэй туслах дүр: Ш.Дэлгэржаргал “Бодлын хулгайч”
4. Шилдэг найруулагч: Ш.Доржсүрэн “Хөх толбот хүмүүс”
5. Шилдэг зураглаач: Д.Ангараг “Бодлын хулгайч”
6. Шилдэг зураач: Ж.Цог, Н.Батжаргал “Долоон бурхан харвадаггүй”
7. Шилдэг дуу: Б.Дашдондог “Хүний хүүхэд”
8. Шилдэг хөгжим: Н.Жанцанноров “Богд хаан”
9. Шилдэг монтаж: Ш.Мөнхбат “Долоон бурхан харвадаггүй”
10. Шилдэг дууны найруулагч: Б.Баттуваан “Бодлын хулгайч”
11. Шилдэг зохиол: Д.Төрмөнх “Бодлын хулгайч”
12. Шилдэг дүрсний эффеккт: Ш.Тансаг “Нэг биений хоёр зүрх”
13. Шилдэг нүүр будалт: Б.Дагирмаа, Б.Сүрэнцэцэг “Хүний хүүхэд”
14. Шилдэг дебют: Я.Хангарьд “Орлон тоглогч”
15. Шилдэг хөрөнгө оруулагч: М.Равданжамц “Хөх толбот хүмүүс”
16. Шилдэг баримтат кино: Г.Батбаатар "Дөрвөн бүлэгт амьдрал"

Гран-при шагнал: “Бодлын хулгайч”

Түүнчлэн кино наадмын үеэр Төрийн шагналт, Урлагийн гавьяат зүтгэлтэн, нэрт кино найруулагч Б.Балжиннямыг Монголын кино урлагийн хөгжилд үнэтэй хувь нэмэр оруулсан зүтгэлтнээр нэрлэсэн юм.