Хан-Уул  дүүргийн  IV хороо Нүхтийн аманд шинээр барьж байсан барилга хоёр хоногийн өмнө нурж зургаан хүн дарагдаж  нэг нь нас барсан билээ.  Барилгын ажлыг мэргэжлийн бус хүмүүс гүйцэтгэж  байснаас болж  энэхүү осол гарсан гэд­гийг урьдчилсан байдлаар тог­тоосон. О.Мэндсайханы  эзэмш­лийн гурван айлын энэхүү амины орон сууцыг тойрсон асууд­лууд ар араасаа урган гарч байна. Зөвшөөрөлгүй,  зураг төслөө хариуцсан газ­раар батлууллаагүй, мэргэж­лийн барилгын бригад ажиллуулаагүй зэргээр хууль бус олон үйлдэл илэрч байгаа юм. Барилга нурсан шалтгааныг тодруулахаар МХЕГ, НОБГ, Хан-Уул дүүргийн Цагдаагийн хэлтэс зэрэг газрууд ажиллаж байна. Асуудлын эргэн той­ронд юу болж буйг сурвалжлахаар эхний ээлжинд МХЕГ-ыг зорьсон юм.  Уг хэрэгт тус газрын Дэд бүтцийн хяналтын албаны байцаагч нар дүгнэлт гаргахаар  ажилаж байгаа билээ. Дэд бүтцийн хяналтын албаны дарга Л.Батбаатараас асуудлыг тодруулахад “Тусгай хамгаалалтай газар нутагт амины орон сууц барих ёсгүй. Манай байцаагч нар барилга нурсан шалтгааныг тодруулахаар ажиллаж байна. Асуудал тодорхой болохоор дэлгэрэнгүй мэдээлэл өгнө.  Ямар ч байсан манайхаас зөвшөөрөл аваагүй юм билээ. Хэргийн материалыг цагдаа аваад явсан. Тодорхой өгөх мэдээлэл одоохондоо   алга” гэв.  Барилгыг барихад ямар стандарт норм мөрддөг, барилга нурахад нөлөөлсөн  ханын цемент хэ­дий хугацаанд бэхжилттэй бол­дог,  амины орон сууцыг барихад зөвшөөрөл заавал авах ёстой юу зэргийг тодруулахаар ЗТБХБЯ-ны мэргэжилтэн Н.Ням­дэлэг, Нийслэлийн  Хот төлөвлөлтийн газрын Хан-Уул дүүрэг хариуцсан архитектур Б.Энхтүвшин нартай уулзсан  юм. Мөн барилгад дарагдсан ч азаар амьд үлдэж, эмнэлэгт хэвтэн эмчлүүлж байгаа таван залуугийн биеийн байдлыг нь эмчээс нь тодруулсан юм.

-Тусгай хамгаалалтын  бүст  амины орон сууц барьж болохгүй  гэнэ.  Газраа яаж авсан  хэрэг вэ?

-Байгаль орчны яамнаас ямар зориулалтаар газар олгосныг нь мэдэхгүй. Тусгай хамгаалалттай газар  учраас дүүргийн Газрын алба ч оролцох ёсгүй. 

-Барилга барих зөвшөөрлийг танайхаас авах ёстой юу?

-Зөвшөөрлийг нь МХЕГ-аас авах ёстой. Манайд зураг төслөө үзүүлж дүгнэлт хийлгүүлдэг журамтай.

-Танайд зураг төслөө үзүүлсэн үү?

-Үгүй. Зураг төслөө үзүүлэх­гүй дур мэдэн барилгын ажил эхэлсэн. Зөвшөөрөл ч аваагүй.

-Амины орон сууц ч байсан заавал танайхаас зөвшөөрөл авах ёстой юм уу?

-Нийслэлийн харьяа газар. Үерийн амнаас  зайтай эсэх, цэвэр бохир ус,  инженер шугам сүлжээний  асуудлаа яаж шийдсэн зэргээр суурьшлын бүс үүсгэхэд юуг зохицуулах ёстой, тэр бүгдийг манайхтай зөвшилцөх учиртай.  Барилга том бага нь хамаагүй бүрэн хэмжээний бичиг баримт боловсруулах ёстой юм.

-Баримт бичгийг нь шалгасан уу?

-Манайд барилга барина гэдгээ ч мэдэгдээгүй. Зөвшөө­рөл­гүй барилга барьсан асуудал Нүхтийн аманд олон бий. Үүнд төрийн байгууллагууд хатуу хя­налт тавьж зохицуулах шаардлагатай болсон.

-Зөвшөөрөлгүй барилгын ажил эхлүүлэхээр ямар хариуцлага хүлээлгэх вэ?

-Хариуцлага тооцох нь манай асуудал биш. Хуулийн дагуу л хариуцлага тооцох байх.

-Хэсэг хугацааны дараа дахин барилгын ажлаа үргэлжлүүлэх байх даа?

-Зөвшөөрөл л байхгүй юм чинь хариуцлага тооцож да­хин   үргэлжлүүлэхгүй байх. Барил­гын ажлаа үргэлжлүүлэх  бол зөвшөөрлөө  ном  журмын дагуу авах ёстой.

Н.НЯМДЭЛЭГ: ДААЦЫН ХАНЫН БЭХЖИЛТИЙН ХУГАЦАА 28 ХОНОГ БАЙДАГ

-Мэргэжлийн бус хүмүүс барилгын ажил гүйцэтгэснээс болж барилга нурж хүн нас барлаа. Ер нь барилгын бригад, ажилчид дээр танай яамнаас ямар хяналт тавьдаг вэ?

-Барилгын ажил эрхлэх тусгай зөвшөөрөлтэй компанид хя­налт тавьдаг. Хөлсний ажилч­дад хяналт тавих боломжгүй.

-Амины орон сууц  барихад танай яам ямар оролцоотой юм бэ?

-Оролцоогүй. МХЕГ, Нийс­лэлийн Хот төлөвлөлтийн газрын байцаагч нар хяналт тавих байх.

-Хувийн орон сууцыг зөвшөөрөлтэй барилгын компани гүйцэтгэх ёстой гэсэн зүйл, заалт байхгүй юу?

-Байхгүй.  Гэхдээ мэргэжлийн хүн барилгын ажлыг удирдан гүйцэтгүүлэх ёстой.

-Барилгын бригадын тоо олширсон. Гэтэл тэд ямар ч хяналтгүй, барилга дээр ажиллах эрх, зөвшөөрөл ч  үгүй байдаг юм биш үү?

-Хуулиар бригадын ажилчдын эрх үүргийг тусгайлан зохицуулаагүй. Харин Барилгын тухай хуулийн 16 дугаар зүйлийн 16.6-д Барилга угсралтын ажлыг эрх бүхий байгууллагын зөвшөөрөлгүйгээр эхлэх, үргэлжлүүлэхийг хориглоно гэж заасан бий. Нүхтийн аманд баригдаж байсан тэрхүү барилга зөвшөөрөл аваагүй гэсэн.

-Нурсан  шалтгааныг нь хананд цутгасан цемент бэхжээгүй байхад таазны цутгалтыг хийснээс боллоо гэж мэргэжлийн хүмүүс урьдчилсан дүгнэлт гаргасан. Хананд цутгасан цемент хэдий хугацаанд бүрэн бэхждэг юм бэ?

-Даацын ханын  бэхжилтийн хугацаа 28 хоног байдаг. Бэхжилт 70 хувьтай болсон тохиолдолд бэхэлгээг авдаг стандарт нормтой.

-Гэтэл аврах ажиллагаа явагдаж байхад зуурмаг нь нойтон байсан шүү дээ?

-Барилга барих стандартын норм зөрчсөн учраас осол гарч байгаа юм. Миний авсан мэ­дээллээр ханын цутгалтын цементийг хийснийхээ дараа шууд таазны цутгалтыг хийчихсэн юм билээ. Тэгэхээр нурах нь тодорхой.

-Түргэн хугацаанд хатдаг цемент гэсэн шүү дээ?

-Технологи нь тийм байж болно. Гэхдээ хана бүрэн бэхжсэний дараа дараагийн цутгалтыг хийх ёстой.

-Барилгын ажлыг мэргэжлийн хүн удирдана гэж ярьсан. Амины орон сууц барихад хамаарахгүй гэж үзсэн юм биш биз дээ?

-Орон сууц, олон нийт, үйлдвэрийн барилгыг мэргэж­лийн хүнээр удирдан гүйцэтгэх ёстой гэсэн заалт хуульд бий. Гурван айлын амины орон сууц ч гэсэн энэ хуульд хамаарах ёстой.