Жил дараалан цолоо ахиулсаар Үндэсний баяр наадамд цэл залуугаараа түрүүлсэн С.Мөнхбат аваргыг зан төлөвшлийн хувьд ч, бөхийн ухааны талд ч хий багатай, зөв хүн гэж үнэлэх нь бий. Өнгөрсөн жилийн баяр наадамд түрүүлснээрээ олны анхаарлын төвд алхаж гишгэх болсон залуу аваргын нийтэч зан энгийн үзэгчдэд ч таалагддаг юм.

Сүүлийн үед түүний уран барилддаг шиг нь бас нэгэн спортын авьяас илрээд буй нь сагсан бөмбөг. Тавдугаар сарын 23-нд болох үндэсний бөхчүүд, сумочдын сагсан бөмбөгийн нөхөрсөг тэмцээнд шаргуу бэлтгэж байгаа аваргыг мэргэжлийн сагсчид хүртэл өндөр үнэлэх юм билээ. Хурдтай, адтай, бас гурвын шидэлт алддаггүй С.Мөнхбат аварга багийнхаа бөхчүүдийн хамт “Спортын төв ордон”-нд бэлтгэлээ базааж байгаа нь энэ.

Б.БАЯСАХ