Францын сонгогдсон ерөнхийлөгч Франсуа Олланд тавдугаар сарын 15-нд бүрэн эрхээ баталгаажуулсныхаа дараа Елисейн ордонд амьдармааргүй байна, Парисийн сууцандаа илүү чөлөөтэй байдаг хэмээн сэтгүүлчдэд ярьжээ. Тэрээр Парисийн 15 дугаар дүүргийн Богреналь хороололд байдаг сууцнаасаа холгүй зоогийн газар хооллосныхоо дараа хөршүүд болон сэтгүүлчидтэй уулзсан байна. Тэрээр “энгийн” ерөнхийлөгч байна гэдгээ дахин давтан хэлжээ. Энгийн ерөнхийлөгч байна гэсэн дүрийг тэрээр өөрийнхөө сонгуулийн кампаниар хангалттай илэрхийлж чадсан учраас “энгийн-ерөнхийлөгч” гэсэн хочтой болсон юм.

“Би эндээ л баймаар байна. Таван жил энд амьдрахдаа би өөрийн гэсэн дадал, зуршилтай болсон хүн. Зоогийн газар, нарийн боовны дэлгүүрээр орох дуртай” хэмээн тэрээр ярьжээ. Елисейн ордны амьдралын нөхцөл байдлыг мэдэхгүйгээ тэрээр хэлсэн байна. Нэгэн хүн шинээр сонгогдсон ерөнхийлөгчийг машиных нь дэргэд зогсоон гар бариад удтал хүүрнэлдэв. “Сайн байна уу, мсье Олланд! Би Моник эгч чинь байна” гэж нэгэн эмгэн түүнтэй мэндлэхэд тэрээр “Тэгэлгүй яахав, тэгэлгүй яахав, Сайн байна уу, амьдрал дажгүй юу?” гээд  түүнийг хацар дээр нь үнсч байв. Олланд өөрөө жижиг дэлгүүрээр орж худалдаа хийх дуртай. Амралтрын өдрүүдэд хамтран амьдрагч Валери Триервейлерын хамт ногоон захаар орон зугаалдаг байсан. Ерөнхийлөгчөөр сонгогдвол энэ бүгд алга болно гэж харамсангуй ярьж байлаа.