Дундговь аймгийн Иргэдийн төлөөлөгчдийн хурлын 11 дэх хуралдаан өнөөдөр болж байна.  Өглөө эхэлсэн хуралдаан “Дундговь аймгийг 2012-2031 онд хөгжүүлэх хөгжлийн бодлого, стратеги төлөвлөгөөг хэлэлцэх эсэх дээр  төлөөлөгчид бүтэн цаг маргав. Ийм төлөвлөгөө хэрэгтэй юү, үгүй юү, заавал 2031 он хүртэл байдаг нь ямар учиртай вэ, Урьд өмнөх Засаг дарга нарын үед гарч байсан бодлого төлөвлөгөөнөөс юугаараа ялгаатай вэ, Энэ удаа хэлэлцэхээ хойшлуулая гэлцсэн нь маргааны гол сэдэв байлаа. Ингэсний эцэст олонхийн саналаар уул хөтөлбөрийг хэлэлцэх болж Засаг даргын орлогч С. Сүхбаатарын мэдээллийг сонслоо. 

Илтгэгч тус аймгийн хөгжлийн бодлогын  агуулгыг “Дуу хуур, өв соёлоо дээдэлж оюунлаг, бүтээлч иргэдтэй, дэд бүтэц,эдийн засгийн салбарууд цогцоор хөгжсөн, байгальд ээлтэй аймаг  байх” хэмээн тодорхойлсон юм.  Энэ хүрээндээ мэдээлжсэн нийгмийн хүрээнд орчин үеийн мэдээллийн технологиор дамжуулан иргэдээ шуурхай, бодит, үнэн зөв мэдээллээр хангах,  хатуу, зөөлөн  дэд бүтцийг бий болгох, засаглалыг хөгжүүлэх, гадаад харилцааг өргөтгөх  талаар тавьж буй зорилтуудыг  дэлгэрүүлэн тайлбарлалаа. Хуралдаан үндсэн асуудлаа ид хэлэлцэж асуулт хариулт, санал шүүмжлэл үргэлжилж байна. Дараа нь 2011 оны төсвийн гүйцэтгэл,  аймгийн 70 жилийн ойн “Дундговь-70” сангийн зарцуулалтад хийсэн аудитын дүн, орон нутгийн сонгуулийн тойрог байгуулах тухай асуудлыг хэлэлцэх юм