Эгч дүү гурван Урнаагийн ууган нь болох жүжигчин У.Уранчимэг уран бүтээлийн хувьд амжилттай яваа ч хувийн амьдралдаа цаг зарцуулж чадахгүй байгаадаа сүүлийн үед бухимдах болжээ. Урлаг гэдэг хатуу шалгууртай, хүнээс ямар золиос шаарддаг учраас хайртай ганц охиноо  дүүтэй болгож, нөхөртөө голомт залгах хүүг нь төрүүлж өгч амжихгүй яваадаа ийнхүү сэтгэл дундуур явдаг болсон гэнэ. Урлагт хөл тавьсан цагаасаа УДЭТ-аар овоглосон тэрбээр сүүлийн үед хүүхэдтэй болох талаар бодож эхэлсэн бөгөөд харамсалтай нь “хувьсгалын тохироо” бүрдэхгүй байгаа бололтой. Энэ тухайгаа гавъяат маань хэвлэлд өгсөн ярилцлагадаа  “Энгийн нэг эмэгтэй байсан бол би дуртай цагтаа жирэмслээд хүүхэд төрүүлэх байсан. Гэтэл урлагийн хүн дээрээс нь жүжигчин учраас дуртай үедээ театраа орхиод хувийн амьдралаа хөөгөөд явах эрхгүй нь харамсалтай” гэжээ.