УИХ-ын ээлжит сонгууль болохтой холбогдуулан МҮЭ-ийн холбооны нэр хүндэд халдсан үйлдэл удаа дараа гарч байгаа талаар С.Ганбаатар хэвлэлийн бага хурал хийлээ. 

МҮЭХ-ны нэрийг ашиглан Сэлэнгэ аймгийн засаг даргыг УИХ-ын сонгуульд нэр дэвших гэж байгаа тул дэмжээрэй гэх мэдээллийг үүрэн телефоны утсаар санал асуулга нэрээр далд сурталчилгаа явуулсан байна. Энэ нь УИХ-ын сонгуулийн тухай хуулийн  35.15.4, 35.18.4, 35.24, 35.25 дахь заалтуудыг ноцтой зөрчсөн гэж МҮЭХ-ныхон үзэж байгаа ажээ. Хурлын үеэр МҮЭХ-ны ерөнхийлөгч С.Ганбаатар “МҮЭХ нь Монгол Улсын Их хурлын сонгуулийн тухай хуулийг зөрчиж, 2012 оны УИХ-ын сонгуульд нэр дэвшигч нартай холбоотой хууль бус сурталчилгаа, санал асуулгыг зохион байгуулаагүй болохыг хариуцлагатайгаар мэдэгдэж байна. МҮЭХ-ны  гишүүд хөдөлмөрчдийн нэр хүндэд санаатайгаар халдаж, УИХ-ын сонгуулийн хууль бус сурталчилгаанд ашиглаж байгаа энэхүү үйлдлийг таслан зогсоохоор холбогдох хууль хяналтын байгууллагад  хандан,  зохих хариуцлага  тооцуулахаа мэдэгдье” гэсэн юм.