Тавантолгойн ашиглалт олборлолтод үндэсний компаниуд хамтдаа оролцохоор санаа шулуудан “Монгол-999” үндэсний компаниудын нэгдлийг байгуулсан. Хэдийгээр мянган компанийг нэг сая төгрөгийн босготойгоор бүртгэнэ гэж байсан ч бүртгүүлэгчдийн тоо 1600-д хүрсэн тухай мэдээлэл тархаад байна. Яг хичнээн компани нэгдээд байгаа талаар ажлын хэсгийнхнээс тодруулахыг хүссэн боловч утсаа авах хүн олдсонгүй. Ямартай ч “Монгол-999”-ийнхэн хоёр өдрийн турш хуралдаж, компанийнхаа дүрмийг батлаад байна. Харин ТУЗ-ийн гишүүдээ сонгож хараахан амжаагүй байгаа бөгөөд ТУЗ-өө хэдэн хүнээс бүрдэхийг ч шийдэж амжаагүй байгаа ажээ. Анх 21 хүнийг ТУЗ-д сонгохоор ярилцаж байсан ч сүүлдээ 13, 51 гэсэн хоёр тоог санал болгосон байна.Тус компанийн хувь заяа ТУЗ-ийн гишүүд хэн байхаас, тэр хүмүүс нь хэр шударга ажиллахаас шууд шалтгаалах билээ.  “Монгол-999” монголчуудын эв нэгдлийн баталгаа болон гарч ирсэн шигээ ард түмний язгуур эрх ашгийн төлөө ажиллах ёстой гэдэг дээр олон хүн санал нэгдэж байгаа юм.

Д.Цээнэ