Хүний хөгжил сангаас 1,5 сая төгрөгийг бэлэн болон бэлэн бусаар иргэдэд олгож байгаа билээ. Үүний бэлнээр олгох 500 мянган төгрөг буюу сар бүрийн 21 мянган төгрөгийг ирэх долдугаар сар хүртэл олгоод дуусна. Гэвч сар бүр олгож буй 21 мянган төгрөгийг авч чадаагүй иргэд цөөнгүй байдаг. Эдгээр иргэд 21 мянган төгрөгөө нөхөн авч болох эсэхийг Хөдөлмөр халамж үйлчилгээний газрын дэд дарга Ж.Эрдэнэбаатараас тодрууллаа.

– Хүний хөгжил сангаас сар бүр олгож байгаа 21 мянган төгрөгийг өнгөрсөн жил авч чадаагүй хүмүүс одоо нөхөн авч болох уу?

-Болно. Тухайн хүн иргэний шинэчилсэн бүртгэлдээ хамрагдсан л бол Хүний хөгжил сангаас бэлнээр олгож байгаа сар бүрийн 21 мянга төгрөгийг авах эрх үүснэ.

-21 мянгийг энэ зургадугаар сарыг дуустал олгоно. Үүнээс өмнө авч чадахгүй бол нөхөн авч болох уу?

-21 мянган төгрөгийг долдугаар сар хүртэл олгоно. Тухайн хүний нэр дээр данс үүссэн байгаа учраас нөхөн авч болно.

-Данснаас буцаан татахгүй гэсэн үг үү. Зургадугаар сардаа багтааж авч чадахгүй бол нөхөж олгохгүй, мөнгийг нь эргүүлэн улсын орлого болгоно гэсэн ойлголт хүмүүст байна л даа?

-Данснаас буцаан татахгүй. Ер нь нөхөж авч болно, тухайн хүний дансанд нэгэнт байршчихсан байгаа учраас.

-Ахмад настан болон хөгжлийн бэрхшээлтэй иргэдэд олгох нэг сая төгрөгийг хэзээнээс олгож эхлэх вэ. Уг нь дөрөвдүгээр сараас 330 мянган төгрөг олгоно гэж байсан ч одоо хүртэл иргэд мөнгөө авч чадаагүй байна?

-Сангийн яамнаас ойрын хугацаанд санхүүжилтийг нь гаргаж өгөхөөр яригдаж байна.