Лондонгийн олимпийн наадмын үеэр бадамлах бамбарын галыг асаах ёслолын ажиллагаа энэ пүрэв гарагт Грекийн Олимпия уулын хормойд, эртний олимпийн наадам явагдаж асан газар болно. Нарны гэрлээс гарган авдаг энэхүү галыг асаах ёслолын ажиллагаанд 5000 гаруй хүн оролцох ажээ. Түүнчлэн ОУОХ-ны Ерөнхийлөгч Жак Рогге, Лондонгийн олимпийн зохион байгуулах хорооны ерөнхийлөгч Лорд Себастьян Кое, Грекийн олимпийн хорооны удирдах албаны хүмүүс арга хэмжээнд хүрэлцэн ирэх юм. Олимпийн бамбар ассаны дараа Грек гаралтай Их Британийн усанд сэлэгч Спирос Гианитос буухиаг эхлүүлэх юм.