ОХУ-ын Ерөнхий сайд Владимир Путин дөрвөн жилийн дараа дахин тус улсын төрийн тэргүүн болж байна. Түүний Ерөнхийлөгчийн албан тушаалаа хүлээн авч, тангараг өргөх ёслолын ажиллагааг “Ийгл Ньюс” телевиз анх удаа шууд дамжуулах гэж байна. Ёслолын ажиллагаа дэлхий даяар Даваа гаригт буюу өнөөдөр Москвагийн цагаар 11.30 цагт /Улаанбаатарын цагаар 15.30/ эхэлнэ. Ёслолын ажиллагаанд өнөөгийн Ерөнхийлөгч Д.Медведев, Ерөнхий сайд В.Путин, Холбооны Зөвлөлийн дарга В.Матвиенко, Төрийн Думын дарга С.Нарышкин, Үндсэн хуулийн Цэцийн дарга В.Зоркин болон тус улсын парламентын Дээд, Доод танхимын гишүүд, гадны орны Элчин сайд, Консул, Өргөмжит Консул, ОУ-ын байгууллагын төлөөлөгчид оролцох юм.

“Ийгл Ньюс” телевизийн Гадаад мэдээний алба нь сүүлийн нэг жилийн хугацаанд Кэмбрижийн  гүн Уильям, гүнгийн ахайтан Кейт нарын хуримын ёслол, Усама Бен Ладеныг устгасан явдал, Аугаа эх орны дайны 66 жилийн ойн Цэргийн парад, 2011 оны Хойд Африк, Ойрхи Дорнодын “Арабын хавар”, Хурандаа М. Каддафигийн эргэн тойрон дахь мэдээлэл, Умардын удирдагч Ким Чен Ирийн гэнэтийн үхэл, ОХУ-ын Төрийн Дум болон Ерөнхийлөгчийн ээлжит сонгууль, Японы байгалийн гамшгийн 1 жилийн ойн арга хэмжээ зэрэг дэлхийн нийтийн анхааралын төвд байсан олон чухал үйл явдлыг цаг алдалгүй Монголын үзэгчдэд хүргэсэн билээ.