Төв аймгийн урьдчилан хорих төвд  22 хоног хоригдсон МАХН-ын дарга Н.Энхбаяр өнгөрсөн баасан гаригийн өглөөнөөс  эхлэн өлсгөлөн зарлаж бай­гаагаа мэдэгдсэн юм. 

Тэрбээр өлсгөлөн зарласнаасаа хойш нэг хоногийн да­раа буюу өнгөрсөн бямба гаригт бие нь муудаж намын нөхөд бо­лон ар гэрийнхэн нь Төв аймгийн урьд­чилан хорих төвд цугларав. Тэд Н.Энхбаяртай уулзуулах шаардлага тавь­сан боловч тэрхүү шаардлагыг нь хол­богдох газрууд нь хүлээн аваагүй байна. Хяналтын эмч болон Эрүүл мэндийн яамны эмч нарын баг Төв аймгийн урьдчилан хорих төвд очин Н.Энхбаярын биед үзлэг хийхийг оролд­сон боловч сэжигтэн өөрөө биеэ үзүү­лэхийг хүсээгүй учраас биеийн байдал нь улам хүндэрсэн ажээ. Тиймээс мөн өдрийн 14.00 цагийн үед эмч нар ал­бадан шинжилгээ хийсэн бөгөөд  эмч нарын зөвлөгөөний хурлаар яаралтай эм­чилгээ хийх шаардлагатай гэсэн дүгнэлтэд хүрсэн байна.  Эмч нарын дүг­нэлтээр түүнийг хорих 461-р ангийн эмнэлэгт шилжүүлэх шийдвэрийг гар­га­сан гэнэ. Харин өвчтөн өөрийн хү­сэлтээр хоёрдугаар эмнэлэгт хэв­тэхийг хүссэн ч зөвшөөрөөгүй тул  алба­дан эмчилгээнд явахгүй, хуурай өлс­гөлөнгөө үргэлжлүүлэхээр болсон юм.

Олон улсын гэрээ контактад хуурай өлсгөлөн зарласан хүнийг албадан зогсоох, мөн эмчилгээ хийх нь тухайн хүнийг доромжилсонд тооцдог гэнэ. Хэрэв эмчилгээ хийвэл өөрийн зөвшөөрлөөр хийдэг аж. Мөн бие нь муудсан тохиолдолд заавал өөрийн хүсэлтээр эмчилгээнд хамруулдаг учраас ийнхүү  эмч нарын хувьд өлсгөлөнг зогсоох арга хэмжээ авах боломжгүй байсан бололтой.

Өлсгөлөн зарласан Н.Энхбаяр өлсгөлөнгөө зогсоохгүй, мөн эмчилгээ хийлгэхийг хүсээгүй учраас ШШГЕГ-аас бямба гаригийн 19.00 цагийн үед Н.Энхбаярыг эхнэр О.Цолмон, хүү Э.Батшугар нартай уулзуулахаар болжээ. Гэвч  ямар нэгэн шалтгааны улмаас ар гэрийнхэн нь мөн л Н.Энхбаяртай уулзаж чадсангүй.  Үдшийн 20.00 цагийн үед түүний биеийн байдал дахин муудаж, хорих 461-р ангийн эмнэлэгт  албадан хүргэсэн байна. Ингэхдээ ШШГЕГ-ын ажилтнууд түүнийг дамжлан, хөлийг нь дахин гозолзуулаад авч явсан аж. Өлсгөлөн зарласан Н.Энхбаярыг  ар гэрийхэнтэй уулзуулаагүй хэвээр байгаа бөгөөд түүний хүү Э.Батшугар өчигдөр ШШГЕГ-т хандаж хүсэлт гаргаж буйгаа хэвлэлийнхэнд танилцуулав. Уг хүсэлтдээ “Миний аавын биеийн байдал муу байна. Үхэл амьдралын заагт байхад үр хүүхэдтэй нь уулзуулахгүй байгаад гайхаж байна. Хоол идээгүй 72 цаг болоод байна. Мөн хуурай өлсгөлөн зарлаад 51 цаг болж байна. Би аавыгаа хүнээр дамжлуулан явааг хоёр дахь удаагаа харлаа. Шударга ёсны төлөө амиараа дэнчин тавьж байгаа аавынхаа зоригоор бахархаж байна. Аавтай минь уулзуулж өгөөч”  гэсэн хүсэлтийг ШШГЕГ-т хүргүүлсэн ажээ.

Хуурай өлсгөлөн зарлах нь өлсгөлөн зарлах хамгийн хүнд хэлбэр бөгөөд цаашид удаан үргэлжилбэл эрүүл мэнд, амь насанд аюултай гэдгийг эмч нар хэлж буй. Түүний ар гэрийхэнд эмчилгээ хийж байгаа эсэх талаар мэдэгдээгүй байгаа юм байна. Дугаар шилжих мөчид түүнд ямар нэг эмчилгээ хийж эхлээгүй байсан юм.