МАХН-ын гишүүд болох Б.Батболд, З.Баянсэлэнгэ, М.Амартүвшин, Я.Мөнхсайхан, Д.Шонхоо нарыг өнөөдөр Чингэлтэй дүүргийн шүүхийн Эрүүгийн танхимд шүүх хурал боллоо. Гэвч шүүх бүрэлдэхүүн хэргийг хянан үзээд хэргийн бүрдүүлэлт дутуу, гэм буруутайг нотлох хангалттай баримт бүрдээгүй байна хэмээн нэмэлт мөрдөн байцаалтад буцаасан байна.Хуралд шүүгчээр И.Ганбат, улсын яллагчаар Ц.Хашбаатар нар оролцов. Шүүх хурлын үеэр шүүгдэгч нарт 6 жилийн ял урьдчилан төлөвлөсөнөө мэдэгджээ.
    
Тэднийг Нийслэлийн прокурорын газрын хяналтын прокурор О.Мөнхбаатарын биед халдан, хуулиар хүлээсэн үүргээ гүйцэтгэж байхад нь хүч хэрэглэсэн гэсэн үндэслэлээр тэдэнд Эрүүгийн хуулийн 230 дугаар зүйлийн 230.1, 245.1-д зааснаар үндэслэн буруутгаж байгаа юм. Сануулахад, Өнгөрөгч арваннэгдүгээр сарын дундуур экс-Ерөнхийлөгч Н.Энхбаярын туслах Б.Тулгыг УМБГ-аас баривчилсны саатуулсны дараа Б.Батболд, З.Баянсэлэнгэ, М.Амартүвшин, Я.Мөнхсайхан, Д.Шонхоо нарын хүмүүс түүнийг суллахыг шаардаж, нийслэлийн прокурорын газрын  гадаа жагсаал зохион байгуулахдаа прокурорын биед халдсан хэрэгт буруутгагдаж байгаа юм.