Монгол Улсын 26 дахь Ерөнхий сайд С.Батболд гэж хэн бэ. Өнгөрөгч дөрвөн жилийн түүхэн үйл явдлуудын автор нь болсон энэ эрхэмд хүний анхаарал татахуйц олон зүйл бий. Сүхбаатарын Батболдын ээжийг нь Янжмаа гэдэг. Тэр ч бүү хэл, өвөө нь Цагаан дээлт Дамдинтай нэр нэг. Ховорхон энэ тохиолдол мань хүнийг улс төрд хөл тавьж, олонд өөрийгөө таниулахад том сурталчилгаа болж байсан юм даг.

Хилийн цаана хоёр ч сургууль дүүргэсэн, шаггүй сайн бизнесмэн. Англи, франц, орос хэлтэй тэрбээр С.Баярын Засгийн газрын үед Гадаад харилцааны дэд сайдад томилогдож, хөлгүй далайд завьтай орж ирж байлаа. 2009 оны өвөл С.Баяр өвчний шалтгаанаар намын даргын суудлаа, танхимын нөхөдтэй нь хүлээлгэн өгөх болсноо дуулгаж, энэхүү хүнд хийгээд хариуцлагатай үүргийг Сүхбаатарын хүүд шилжүүлэх сонирхолтой буйгаа сонордуулсан юм. Мэргэжил боловсролын хувьд өөлөх зүйлгүй ч улс төрийн туршлагагүй хэмээн гомдоллох өнгө аяс танхимаас цухалзаж байв. Гэсэн ч түүнд олонхийн саналаар ачааг үүрүүлсэн. Энэ өдрөөс монголчууд төдийгүй дэлхий нийт түүнийг нүд салгалгүй ажих болсон юм. Монголыг дэлхий сонирхох болсон энэ үед түүнд засгийг тэргүүлэх сорилго, түүхэн шийдвэрүүдийг үзэглэх хариуцлагатай үүрэг давхцсан ч гэж хэлж болно. Олон жилийн турш дуншиж, үе үеийн парламентын босгыг элээж байсан Тавантолгойг эдийн засгийн эргэлтэд оруулах зам мөрийг засч, 2.7 сая хувьцаа эзэмшигчтэй “Эрдэнэс Тавантолгой”-г ч бий болголоо. Энэ бол С.Батболдын түүхэнд дуурсагдах гавьяа. Стратегийн ордууд эхнээсээ эдийн засгийн эргэлтэд орсноор монголчууд урьд нь хэлж байгаагүй том тоонууд дунд эргэлдэж, төсвөө ч баталдаг болов. Товчхондоо, монголчууд мөнгөгүй зовлонгоос ангижрах нь тэр. Өөрөөр хэлбэл, эдийн засгийн салбар дахь реформын шинжтэй олон шийдвэр түүний үзэгний үзүүрээс гарсан.

Хүн бүр хувьцаа эзэмшигч болсонтой холбоотой Хөрөнгийн биржийг олон улсын стандартад нийцүүлэх алхам хийсэн. Уул уурхай дагасан бүтээн байгуулалтын ажилд томоохон түлхэц өгөх Хөгжлийн банкийг бий болгосон гэхчлэн дурьдаж болно. Бизнесийн салбараас хуримтлуулсан туршлага, үүнээс улбаалсан прагматик нь улс орны хөгжлийн гарцыг олоход томоохон хувь нэмэр орууллаа хэмээн улс төр судлаачид дүгнэх нь бий. Үнэхээр ч С.Батболдын заасан замаар өнгөрсөн жилүүдэд явахдаа монголчууд бадар барихаа больж, баялгийнхаа шимийг хүртдэг боллоо. Наанадаж л, “100 мянган айлын орон сууц” хөтөлбөрийн хүрээнд мөрөөдлийн байрандаа амьдрах үүд хаалга нь нээгдлээ.

Боловсролын салбарт  Кембрижийг нутагшуулах ажлыг санаачлан хэрэгжүүлэгч нь. Дэлхийд хүлээн зөвшөөрөгдсөн стандартыг эх орондоо идээшүүлснээр монголчууд хаана ч нүүр бардам байхыг жил бүрийн есдүгээр сарын 1-нд сануулна. Үе үеийн Ерөнхий сайд нараас хамгийн боловсролтой нь хэмээн үнэлэгддэг нь эл эрхэм хойч үедээ оюуны хөрөнгө оруулалт хийхийг Оюутолгой, Тавантолгойгоос илүүд авч үздэг. Энэ мэтчилэн улс оронд түүний үзэгний хушуугаар хийгдсэн ажил их бий. Харин намын даргын хувьд уугуул нэрээ сэргээв. Тэртээх 1921 онд анхлан өгч байсан МАН нэрээ сэргээж, коминтернийн шахалтаар авсан “Хувьсгалт” хэмээх үгийг халсан юм. Гэхдээ МАН бол МАХН-ын эхлэл бөгөөд үргэлжлэл. Мөн 2008 онд амласан мөрийн хөтөлбөрөө 90 хувь биелүүлсэн гэдгээ  журмын нөхөддөө ам бардам тайлагнаж харагдсан. Иймээс сонгогчдынхоо өмнө харц дээгүүр байхыг ч сануулаад амжсан.

Стандарт бус Засгийн газар байгуулсан гэх зэмлэлийг хүний өөрийн намынхнаас хүртэж байсан ч ганхуулалгүй авч явсанд нь төрийн хүний төвч, дипломатчийн ноён нуруу, бизнесмений алсын хараа нөлөөлсөн гэлцэх. Ямартай ч өнгөрсөн хугацаанд С.Батболд ямархуу улстөрч, лидер гэдгээ нотолж чадлаа. Зангарагтай мэдэгдлүүдийг удаа дараа хийж, намын эрх ашгаас илүү түмэн олныхоо эрх ашгийг тэргүүнд нь тавих учиртайг АН-ынханд төдийгүй тойргийн гадна, дотнох намууд, иргэний хөдөлгөөнүүдэд мэдрүүлсэн, харуулсан. Даруухан, үг дуу цөөтэй занг нь ашиглаж, буулгаж авахыг санаархагчид түүнийг хүрээлэн байдаг ч С.Батболд уужуу, аядуу зангаараа хэнтэй ч хэл амаа ололцохдоо гарамгай. Энд ойрын ганц жишээ татахад, нэгэн үе ардын хүүхдүүд гудамжинд гарч, багш, эмч нар ордон гороолж нийгэмд таагүй байдал үүссэн. Харин танхимын тэргүүн төрийн хүний мяндсан ухаан сийлж, “босогч” С.Ганбаатартай гурвалсан гэрээ хийж, асуудлыг тэр дор нь намжаасан нь саяхан. Энэ бол цэвэр бизнесмэн болоод дипломат хүнд байдаг зан чанар. Харин улс төрийн хүрээнийхэн түүнийг дүгнэхдээ шийдвэр гаргахдаа нэлээд нухацтай бодож ам нээдэг, няхуур, алдаа бараг гаргадаггүй гэх юм билээ.

 С.Батболдын эрин үед Монгол төр төвхнөж, иргэдийн амьжиргаа сайжирлаа. Түүнийг хойч үеийнхний өмнө хүлээх их хариуцлага, алдах эрхгүй цаг хугацааны эзэн нь байх их ачааг нуруун дээрээсээ унагалгүй үүрч чадлаа хэмээн ард түмэн нь үнэлж байна.