Сэлэнгэ аймгийн 2011 оны тэргүүний сумаар шалгарсан Цагааннуур суманд Сэлэнгэ аймгийн ахмадын хорооны дарга нарын зөвлөлдөх чуулга уулзалт зохиожээ. Уг чуулга уулзалтыг 2011 оноос эхлэн аймагтаа ажил үйлсээрээ тэргүүлж яваа ЗДТГ, Ахмадын хороотой хамтран тойрон аялалын хэлбэртэй ажил хэргийн уулзалт болгон зохиож хэвшүүлсэн тухай Сэлэнгэ аймгийн ЗДТГ-ын хэвлэл, мэдээллийн ажилтан Р.Бумдарь мэдээллээ.

Сэлэнгэ аймгийн  ахмадын хорооныхон төрийн халамж, эрүүл мэнд нийгмийн халамжийг ахмадуудад хүргэх талаар үр дүнтэй ажилснаар бүх сумын ахмадын хороо ажиллах байртай, бие бялдрын дасгал хийх тоног төхөөрөмжтэй , ахмадын өргөөтэй /Орхон сум/  болсон нь сум бүрийн ахмадын хорооны дарга, ИТХ, ЗДТГ, байгууллага, ард иргэд нягт хамтын холбоотой ажилласны үр дүн гэнэ. Сэлэнгэ аймгийн Ахмадын хорооны дарга нарыг Цагааннуур сумын Засаг дарга Ч.Жаргалсайхан хүндэтгэн хүлээн авч уулзан удахгүй баригдах ахмадын өргөөнийхөө талаар тайлагнасан нь ахмадуудад гэнэтийн бэлэг болсон байна.