Германы Мангеймын шүүхээс Microsoft компанийн зарим бүтээгдэхүүнийг тус улсын зах зээлд хориглосон тухай Ройтерс мэдээллээ. Үйлдлийн Windows 7 програм болон 7 Xbox тоглоом хориглосон бүтээгдэхүүний жагсаалтад орсон гэнэ. Microsoft компанийн эдгээр  бүтээгдэхүүн нь Motorola Mobility компанийн патентыг зөрчсөн хэмээн шүүгч Хольгер Кирхер (Holger Kircher) мэдэгдсэн байна. Microsoft компани нь Motorola Mobility компанитай видео тоглоомын алгоритмын талаар тохиролцсон нөхцлөө биелүүлээгүй гэж шүүхээс үзсэн ажээ. Харин Microsoft компани шүүхийн энэ шийдвэр нь тус компани өөрийн бүтээгдэхүүнээ Германы зах зээлд нийлүүлэхэд огт хамааралгүй гэж мэдэгдсэн гэнэ. Түүнчлэн тус компани давж заалдах тухайгаа хэлсэн байна.

Өнгөрсөн дөрөвдүгээр сард АНУ-ын шүүхээс Microsoft болон Motorola Mobility компаниудын дээрхи маргааныг авч үзсэн юм. Одоогоор шүүхийн шийдвэр хараахан гараагүй байна.

Хоёр компанийн хоорондын патентын маргаан 2010 онд эхэлсэн бөгөөд эхний гомдлыг Microsoft компани гаргасан ажээ. Харин Motorola Mobility компани нэг сарын дараа хариу зарга хийсэн гэнэ. Өнгөрсөн дөрөвдүгээр сарын сүүлчээр Олон улсын худалдааны байгууллагаас хоёр компанийн маргааныг Motorola Mobility компанид ашигтайгаар шийдвэрлэсэн юм. Хэрэв Microsoft компани өөрийн буруугаа хүлээвэл компанийн бүтээгдэхүүнийг АНУ-ын зах зээлд мөн хориглох юм байна.

Харин Германы шүүхийн тухайд өмнө ньд Samsung болон Apple компанийн хоорондын патентын маргааныг шийдвэрлэж байсан туршлагатай юм.