Германы шигшээ болон “Кёльн” багийн довтлогч Лукаш Подольски  ирэх зуны Европын аварга шалгаруулах тэмцээний дараа Лондонгийн “Арсенал” багтай нэгдэхээр болжээ. “Их буучид” 26 настай довтлогчийг авахын тулд ойролцоогоор 13 сая евро зарцуулж байгаа гэнэ.

Өнгөрсөн амралтын өдрөөр Английн “Челси” Германы авяаслаг залуу тоглогч Марко Маринг багтаа нэгтгэсэн бол Лондонгийн  “Их буучид” Бундеслигийн “Кёлн” багийн довтлогч Лукаш Подольскиг “Эмират”-д авчрах нь тодорхой боллоо. Подольскийн хувьд анх “ФС Кёлн” багаас карьераа эхлүүлж, 2006-2009 онд “Байерн Мюнхен”-ий төлөө зүтгэж байсан. Хэдий 2009 онд Европын хэд хэдэн багууд залуу довтлогчийг багтаа авчрах гэж оролдсон ч Подольскигийн сонголт өөрийн төрөлх “Кёлн” баг байсан юм. Харин энэ зуны Европын аварга шалгаруулах тэмцээний дараа герман довтлогч Лондонд ирэх болж байна. Хэдий 26 настай ч тэрбээр Герман машинуудын төлөө нийт 95 тоглолтод оролцож 43 гоолыг оруулсан Кёлн хотын бахархал болсон шилдэг тоглогчдын нэг билээ.