Хамуг Монголын хөдөлмөрийн нам, Эрх чөлөөг хэрэгжүүлэгч нам зэрэг улс төрийн хүчнүүд нэгдэн улс орноо аврах “Үндсэн хүчин” гэгч сүржин нэртэй эвслийг байгуулсан. Тэгвэл энэ эвслийг төлөөлөн ХМХН-ын дарга С.Молор-Эрдэнэ, тус намын цацийн дарга, УИХ-ын гишүүн Ц.Шинэбаяр, АН-ын гишүүн О.Магнай, Эрх чөлөөг хэрэгжүүлэгч намын дарга Ш.Төмөрсүх нар өчигдөр сэт­гүүлчдэд мэдээлэл хийлээ. “Үндсэн хүчин” нь бусад нам эвслүүдэд улс орны өмнө тулгамдаж буй асуудлыг шийдвэрлэхийн тулд зөвшилцөж хамтран ажиллахыг уриа­лав. Хэрэв зөвшилцөлд хүрч ча­дахгүй бол бүх хэлбэрээр тэмцэхээ ч мэдэгдлээ. Улс орноо аврах үндсэн хүчний гол зорилго нь улс төрийн намуудыг татан буулгах, ашигт малт­малын салбарийг нийтийн өм­чит хэлбэрээр зохион байгуулах, ха­риуц­лагын тог­толцоог сайжруулах зэ­рэг аж. Энэ үеэр Хамуг Монголын хө­дөлмөрийн намын дарга С.Молор-Эр­дэнээс цөөн асуултад хариулт авлаа.

-Одоо байгаа улс төрийн на­муудыг татан буулгана гэлээ. Яа­гаад ингэж мэдэгдсэн юм бэ?

-Өнөөдөр Монголын улс төрийн намууд  иргэдээ гишүүнчлэл, дэм­жигчдийн холбоо гэсэн нэрийн дор “барьцаалж” байна. Намууд мөн чанараа алдаж бизнесийн бүлэглэл боллоо. Тиймээс одоогийн улс тө­рийн намуудыг татан буулгаж шинэ улс төрийн хүчинүүдийг бий болгох нь маш чухал байгаа юм.

-Намуудыг татан буулгаж чад­даг юм гэхэд шинээр бай­гуулагдах намууд юугаараа өөр байх бол?

-Шинээр байгуулагдах улс төрийн намууд хөрөнгөгүй, гишүүнчлэлгүй, хажуудаа залуучдуудын холбоо, эмэгтэйчүүдийн холбоо зэрэг бүтцийн байгууллагагүй байх ёстой.

-Манай улсын байгалийн бая­лагийг гаднынхан цөлмөөд дуусч байна гэж ярьсаар байгаа боловч өөрчлөгдсөн зүйл алга. Та бүхэн үүнийг өөрчлөхийн тулд яах ёстой гэж үзэж байна вэ?

-Байгалийн баялаг бол нийтийн өмч. Тиймээс ашигт малтмалын сал­барыг нийтийн өмчит корпорацийн хэлбэрт оруулснаар Монголын нийт иргэд баялагаас хувь хүртээд зог­сох­гүй, Монгол улс дэлхийн зах зээлтэй холбогдох боломжтой болно.