Монгол Улсын Засгийн Газар, МҮХАТ-ын хамтран зохион байгуулдаг ТОП-150 аж ахуйн нэгжийн шалгаруулалт амжилттай болж, шилдгүүдээ өргөмжлөх ёслолын ажиллагаа өчигдөр болж өнгөрлөө. Өнөө цагт олширсон олон шалгаруулалт, ёслолын арга хэмжээнүүдийн дотроос бүтээсэн ажил үйлс, улс орны хөгжил, ард түмний амьдралд оруулж буй хувь нэмрээр нь аж ахуйн нэгжүүдийг үнэлж, шалгаруулдгаараа энэ арга хэмжээ өргөн агуулгатай, өндөр ач холбогдолтой болдог билээ. Үндэсний компаниуд, тэр дундаа хувийн хэвшлийн байгууллагуудын үйл ажиллагаа өргөжин тэлж, мянга мянган ажлын байрыг шинээр бий болгож, улсын төсвийн орлогын дийлэнх хувийг бүрдүүлж, эдийн засгийн өсөлт, хөгжлийн гол ачааг нуруундаа үүрч яваа билээ. Тиймээс 2001 оноос эхэлсэн  ТОП-100 аж ахуйн нэгжийн шалгаруулалт энэ оноос хүрээгээ тэлж ТОП-150 болж өргөжсөн юм байна. Улс орны эдийн засаг, бизнесийн өсөлтийг харгалзан үзэж энэ жилээс жагсаалтыг ийнхүү өргөтгөснөөс гадна “Авлигын эсрэг хийсэн ажил, санал санаачилга, үр дүн” гэсэн шалгуур үзүүлэлтийг шинээр нэмж оруулсан байна.

ТОП-150 аж ахуйн нэгжүүдийг шалгаруулахад тухайн жилд улсад төлсөн татварын дүн, борлуулалтын хэмжээ, нийгмийн хариуцлага, шинээр бий болгосон ажлын байр, дэвшилтэт технологи нэвтрүүлэлт, компанийн засаглал, санхүүгийн ил тод байдал зэргийг авч үзсэн бөгөөд нийлбэр дүнгээр М-Си-Эс Групп жагсаалтыг тэргүүлжээ. Энэ нь анх удаа хувийн хэвшил уг жагсаалтыг тэргүүлсэн явдал бөгөөд тус группын хувьд 2011 онд улсын төсөвт 200 тэрбум орчим төгрөгийн татвар, шимтгэл төлжээ. Удаах байруудад Монголын Алт Корпораци, Энержи Ресурс, НИК, Мобиком, Номин Холдинг компаниуд орсон байна. Цаашлаад жагсаалтын эхний 20-д дан хувийн хэвшлийн компаниуд шалгарчээ. ТОП-150 жагсаалтанд багтсан аж ахуйн нэгжүүд 2011 онд нийтдээ 10 мянга гаруй ажлын байрыг шинээр бий болгосны 2 мянга орчмыг нь М-Си-Эс Групп бий болгожээ. Мөн энэ жилийн шалгаруулалтанд “Нийгмийн хариуцлагын чиглэлээр хийсэн ажил, үр дүн” гэсэн үзүүлэлт хамгийн өндөр жинтэй буюу 25 хувийг эзэлсэн байна. Жагсаалтыг тэргүүлсэн М-Си-Эс Группын тухайд нийслэлийн агаарын бохирдлыг бууруулахад оролцож, бүрэн шаталтат 50 мянган зуухыг гэр хорооллын айл өрхүүдэд суурилуулах ажлыг зохион байгуулж, 100 мянган орон сууц хөтөлбөрийн хүрээнд залууст зориулсан бага талбайтай орон сууцны “Шинэ гэр” хорооллыг барьж байгаа зэрэг хийсэн, хэрэгжүүлсэн далайцтай ажлууд нь бодит үр дүнгээ үзүүлж байгааг өндрөөр үнэлсэн байна.