Долдугаар сарын 1-ний гэх хэрэгт буруутгагдаад буй ЦЕГ-ын даргын үүрэг гүйцэтгэгч асан, хошууч генерал Ч.Амарболдын өмгөөлөгчөөр ажиллаж байсан О.Алтангэрэл Үндсэн хуулийн цэцэд гомдол гаргажээ. Тэрбээр  өнгөрөгч гуравдугаар сарын 28-нд болсон шүүх хуралдааны үеэр  өмгөөлөл үзүүлэхээс татгалзаж, шүүх хуралдааныг  орхин гарсан.

Өмгөөлөгч О.Алтангэрэл Үндсэн хуулийн цэцэд хандаж, Монгол Улсын Эрүүгийн хуулийн “Эрх мэдлээ урвуулан ашиглах, хэтрүүлэх, хэрэгжүүлэхгүй байх” гэсэн 294 дүгээр зүйлийн 294.1, 294.2 дахь хэсгийн зарим заалт Үндсэн хуулийн Арван дөрөвдүгээр зүйлд заасан Монгол Улсад хууль ёсоор оршин суугаа хүн бүр хууль, шүүхийн өмнө эрх тэгш байх, хүнийг нийгмийн байдал, эрхэлсэн ажил, албан тушаал, боловсролоор нь ялгаварлан гадуурхаж үл болно гэснийг тус тус зөрчиж байна” гэж гомдол гаргасан байна. Түүний өргөдлийн дагуу үүсгэсэн маргааныг хянан шийдвэрлэх Үндсэн хуулийн Цэцийн дунд суудлын хуралдаан энэ сарын 9-ний өдөр болох юм байна.