Дэлхий нийтийн анхаарал Манчестерт төвлөрч, харин манчестерууд дэлхийн сая сая хөлбөмбөгийн фанатууд цэнхэр, улаанаар ялгарахыг харлаа. Манчестерийн цэнхэр өмсгөлтнүүд болох “Ман Сити” хотынхоо “Улаанууд”-ыг 1:0-ээр буулган авсан тоглолтыг өнгөрсөн шөнө дэлхийн хэмжээнд 600 гаруй сая хүн үзсэн гэх албан бус тоо баримт ч гарчээ. Энэ нь мэдээж Премьер лигийн түүхэнд хамгийн олон үзэгчтэй тоглолт болж байна.

Тоглолтын эхний үеийн нэмэлт цагт Винсент Компанигийн мөргөж оруулсан гоолын ачаар “Сити” Премьер лигийг дахин тэргүүлж эхэллээ. Гол өрсөлдөгчтэйгээ хэдий оноо тэнцсэн ч гоолын зөрүүгээр тэд тэргүүн эгнээнд бичигдээд байгаа юм. Лигийн аварга тодроход хоёрхон тоглолт үлдээд буй энэ үед тэргүүлэгчийн байр суурьт очсон нь лигийн анхны цомоо гардахаар тэмцэж буй “Сити”-гийн хувьд ихээхэн давуу тал болж байна.

Тоглолтын төгсгөлд “Сити”-гийн фенүүд “Blue Moon” дуугаа дуулж, ялалтаа тэмдэглэсэн бол “МанЮ”-гийн босс Сэр Алекс Фергусоны итгэл төгс байдал үгүй болсон харагдаж байлаа.

“Сити”-гийн тухайд үлдсэн хоёр тоглолтоо “Ньюкасл” болон “Квинс Парк Рейнжерс”-ийн эсрэг хийнэ. Харин “Юнайтед” “Свонси” болон “Сандерлэнд”-ийн эсрэг үлдсэн хоёр тоглолтоо хийх юм.

Тоглолтын зургийг ЭНД дарж үзнэ үү