БСШУ-ны яам их, дээд сургуулийг аттестатчлах 2012 оны төлөвлөгөөний дагуу  31 сургуулийг аттестатчлалд хамруулж байгаа тухай БСШУЯ-наас мэдээлж байна. Тус сургуулиудын дүн тавдугаар сарын сүүлээр гарах гэнэ. Одоогийн байдлаар 170 байсан их дээд сургуулиас 95 үлдсэн бөгөөд 152 мянга гаруй оюутан өдрийн бакалаврт суралцаж байна. Үлдсэнийг нь энэ ондоо багтаж аттестатчлах ажээ. Өнгөрсөн онд 55 дээд боловсролын сургалтын байгууллагыг аттестатчлалд хамруулсанаас 14 сургуулийн үйл ажиллагааг нь зогсоох шийдвэр гаргасан билээ. Эдгээр сургуулийн аттестачлалын дүнгээс шалтгаалж үйл ажиллагааг нь бүрэн зогсоох болон зарим нэг чиглэлээр элсэлт авахыг зогсоосон нь ч бий гэнэ.

Энэ талаар БСШУЯ-ны мэргэжлийн боловсролын газрын мэргэжилтэн  Х.Батсайханаас тодрууллаа.

-Үйл ажиллагааг нь зогсоосон сургуулийн оюутнуудыг ямар сургуульд  шилжүүлсэн бэ?

-Тус сургуульд суралцаж байсан оюутныг мэргэжлийнх нь чиглэлийн дагуу курсыг хэвээр нь шилжүүлсэн. Тухалбал, “Гүүр” коллежийн оюутнуудыг Хангай дээд сургуульд, Мэдээллийн технологийн Старс дээд сургуулийн оюутнуудыг ШУТИС, КТМС руу шилжүүлсэн.

-Дээрх 14 сургуулийн үйл ажиллагааг бүр мөсөн зогсоосон гэх ойлголт байгаа?

-Энэ ташаа ойлголт. Зарим сургуулиуд бакалаврын боловсрол олгохын хажуугаар мэргэжлийн сургалт үйлдвэрлэлийн төвийн үйл ажиллагаа явуулж байсан.

Тийм сургуулиудын зөвхөн бакалаврын боловсрол олгох эрхийг нь цуцалж, бусад мэргэжлийн сургалт, үйлдвэрлэлийн эрхийг нь хаагаагүй.

Тиймээс дээрх 14 сургуулиудыг бүгдийг нь үйл ажиллагааг бүр мөсөн зогсоосон гэж ойлгож болохгүй.