Өнөөдрийн бидний амьдралын хамгийн чухал технологийг нээсэн болон мэдээллийн сүлжээг үүсгэсэн зарим ухаантныг РИА Новости агентлагаас нэрлэсэн байна. Хүн төрөлхтөний өнөөгийн амьдралыг IT шинэ бүтээлүүдгүйгээр төсөөлөхийн аргагүй болсон билээ.

Стив Жобс

Apple компанийг үндэслэгчдийн нэг Стив Жобс гар утсыг үндсээр нь өөрчилсөн суутан бөгөөд тэрээр IT ертөнцөд хамгийн их нөлөө бүхий нэгэн болсон юм. Сүүлийн жилүүдэд iPhone  гар утас хамгийн их эрэлттэй ухаалаг гар утсаар бичигдээд байгаа учир гар утас үйлдвэрлэгчид энэ ухаалаг гар утасны функциудад анхаарлаа хандуулаад байна.

Түүнчлэн Facebook сүлжээний саяхан Apple компанитай хийсэн хэдэн тэрбум долларын Instagram  үйлчилгээний гэрээ нь Apple компанийн гар утасны техникийн дэвшлийг харуулах нэгэн тод жишээ юм.

iPhone  гар утаснаас гурван жилийн дараа бүтээгдсэн iPad таблет нь Стив Жобсын оюун ухааны гайхамшгийг бодит зүйл болгосон билээ. Компьютерийн зах зээлийг доргиосон энэ бүтээл нь энэ зах зээлд хамгийн их хэрэгцээтэй байсан “цэнгэг агаар”-ыг авчирсан гэхэд хилсдэхгүй биз ээ.

Мартин Купер

Motorola компанийн Мартин Куперийг гар утсыг анх хийсэн хүн гэж үздэг юм. Мэдээллийн эрин зууны нэгэн нээлт болох гар утсыг хийхээр өрсөлдөж байсан хэдэн компаниудын  гар утсыг бүтээхээр ажиллаж байх үед хэн нь хамгийн анх утсан холбоогүй ярианы аппаратыг хийсэн  цаг хугацааг нь түүхэнд тэмдэглэн үлдээсэн ажээ. Motorola компанид ажиллаж байсан Мартин Купер 1973 оны дөрөвдүгээр сард анхны гар утасны дуудлага хийсэн нь өрсөлдөгч Bell Labs компаниас жаахан түрүүлсэн байна.

Одоо бол гар утас зөвхөн ярих аппарат биш зураг авах, видео бичлэг хийх болон интернэтэд холбогдох үйлдлүүдийг хийх болсон билээ. Харин Мартин Купер энэ бүгдийг гар утсаар хийх нь илүүц гэж үздэг хэвээрээ гэнэ.

Билл Гейтс

IT ертөнцийн хамгийн их нэр хүндтэй төлөөлөгчдийн нэг бол яах аргагүй Билл Гейтс билээ. Тэрээр персонал компьютерийн хамгийн их хэрэглээтэй програмыг бүтээснээрээ дэлхийн толгой баячуудын жагсаалтад бичигдэх болсон юм.

Өдгөө дэлхий дахинд хэрэглэгдэж байгаа бараг бүх персонал компьютерт Windows програмыг ашиглаж байгаа бөгөөд Microsoft компани нь олон тооны ажилтантай томоохон компаниудын нэг болтлоо өргөжсөн байна. Харин Windows програмын сул талыг шүүмжлэгчид Билл Гейтсийг буруутгадаг хэдий ч тэрээр компаниа шууд удирдан ажиллахаа  болиод удаж байгаа  юм.

Роберт Нойс

Intel корпорацийг үндэслэгчдийн нэг Роберт Нойс нь компьютерийн процессор үйлдвэрлэгчдийг манлайлагчдын нэгд зүй ёсоор тооцогдох юм. Тэрээр 40 жилийн өмнөөс Intel 4004 процессор үйлдвэрлэхээр хамтарсан инженерүүдийг удирдаж эхэлжээ. Эхлээд Intel 4004 процессорыг Busicom тооны машины үйлдвэрийн захиалгаар хийж эхэлсэн бөгөөд инженерүүд цаашдын томоохон зорилго бодож амжилгүй ажилдаа орсон байна.

Дараа нь Intel өөрийн дизайны техникийн эрхийг худалдаж авсан бөгөөд Роберт Нойс хагас дамжуулагчийн арав гаруй патентын эзэн болсон ажээ. Түүний эдгээр патентын тусламжтайгаар Intel корпораци персонал компьютерийн микропроцессорын томоохон үйлдвэрлэгч болсон юм. Одоо энэ корпораци гар утасны техник үйлдвэрлэж эхэлсэн бөгөөд ухаалаг гар утасны Atom нэртэй чипийг худалдаанд гаргахад бэлэн болоод байна.

Винтон Серф

Дэлхийн харилцаа холбооны сүлжээг буюу интернэтийг анх бүтээсэн хүн бол Винтон Серф юм. Түүнийг интернэтийн эцэг гэж ч нэрлэдэг ажээ.

1970-аад онд тэрээр Роберт Кантай хамт интернэтийг бүтээхээр ажиллаж эхэлсэн юм  байна. Эхлээд тэд цэргийн ARPANET сүлжээг бүтээсэн бөгөөд дараа нь TCP/IP нэртэй сүлжээг хийсэн гэнэ. Винтон Серф интернэтийн хөгжилд томоохон хувь нэмэр оруулсан ICANN корпорацийг үүсгэн байгуулахад ихээхэн үүрэг гүйцэтгэсэн юм.

1997 онд АНУ-ын Ерөнхийлөгч Билл Клинтон Серф болон Канд шинэ бүтээл болон технологийн салбарт оруулсан гавьяаг нь үнэлэн үндэсний медалиар шагнасан байна. Тэдний шинэ санаа бүтээлийг үнэлэн, 2004 онд Тьюрингийн шагналаар шагнасан юм. Энэ шагнал нь информатикийн салбарт Нобелийн шагналтай эн зэрэгцэх шагнал ажээ. 2005 онд Серф Google корпорацийн дэд ерөнхийлөгч болсон юм.