Тайландын парламентын гишүүд хуулийн төсөл хэлэл­цэж байх үед танхим дахь том дэлгэцэн дээр хагас нүцгэн эмэгтэйн зураг гэнэт гараад иржээ. Гишүүд сандарч, чуулганаа завсарлуулсан бай­на. Уг нь тэд Тайландын Үндсэн хуульд нэмэлт өөрчлөлт оруулах тухай ярилцаж байсан ч эцсийн шийдэлд хүрч чадахгүй байсан юмсанж. Мөнөөх зураг нь дотуур хувцасгүй, цээжээ гараараа халхалсан эмэгтэй байжээ. Хууль сахиулагчид үүнийг хакерчдын халдлага хэмээн таамаглаж байгаа аж. Тиймээс хэрэгтнийг мөрдөн шалгаж эхэлжээ. Хэрэв гэм буруутай этгээдийг олж, олон нийтэд нэрийг нь зарлачихвал Монголоос олон хүн түүнд ажлын санал тавьж магадгүй юм.

Хууль зүй, дотоод хэргийн сайдыг огцруулах эсэх талаар удахгүй УИХ-ын чуулганаар дахин хэлэлцэнэ. Нэг талаас Ц.Нямдорж муухай харж, нөгөө талаас түүнийг огцруулах санал тавьсан хүмүүс хатгаад байхаар гишүүд яах ч учраа олж чадахгүй байсан биз. Тиймээс тэд чуулганы танхим дахь дэлгэцийг хакерчдад найр тавьж, хурлаа түр ч болов завсарлуулах хүсэлтэй байна. Долоодугаар сарын 1-ний хэрэгт холбогдсон цагдаагийн экс дарга нар өмгөөлөгчдөө голж шилсээр байгаад шүүх хурал нь мөд болох янзгүй. Гэтэл тэднийг хэн нэгнээр өмгөөлүүлэх шаардлагатай байдаг. Өмгөөлөгчдийн холбоо­ныхон өрөөндөө цуглаж, энэ тухай ярилцах бүртээ толгойгоо маажиж, “Хэн нэгэн нь өрөөн дэх зурагтыг хакердаасай” гэж боддог болж. Түр ч болов сатаарахгүй юү. “Хүний хөгжил сан”-гаас ахмад настнууд болон хөгжлийн бэрхшээлтэй иргэдэд нэг сая төгрөг олгохоор болсон. Хэдийгээр шийдвэр нь аль эрт гарсан боловч одоо болтол ганц ч хүн мөнгөө аваагүй л байгаа. Харин үүнтэй холбогдуулан Сангийн яам руу утас цохиж, “Хүний хөгжил сан”-д 110 тэрбум төгрөгийн санхүүжилтээ олго­сон эсэхийг асуух хүн олшир­чээ. Тэр бүхэнд юу гэж хариулахаа мэдэхгүй байгаа яамныхан утсыг нь хүн хакердаасай гэж залбирдаг болж. Хакерчдад ажил олгох магадлалтай хүмүүсийн жагсаал­тын зах зухаас нь л энд танилцууллаа. Өөр олон хүн бий, цаана нь.