Нутгийн өөрөө удирдах ёсны байгууллагын 20 жилийн ойг тус аймагт өргөн тэмдэглэлээ. Ойд зориулсан баярын хуралд Монгол улсын Ерөнхий сайд С.Батболд, Байгаль орчин, аялал жуулчлалын сайд Д.Цогтбаатар нар илгээлт ирүүлснийг энд уншин гардуулав. Баярын хуралд аймгийн ИТХ-ын Тэргүүлэгчдийн нарийн бичгийн дарга  Ш.Батсүх тавьсан илтгэлдээ:

-Нутгийн өөрөө удирдах ёсны байгууллагыг  орон нутагт төлөвшүүлэн бэхжүүлэх үйл хэрэгт хүчин зүтгэж ирсэн үе үеийн ИТХ-ын тэргүүлэгчдийн дарга Х.Цэнд-Аюуш, Н.Чагнаа, До.Адьяа, С.Үржин, Н.Мөнгөнцоож, аймгийн Засаг дарга Н.Чагнаа, Ж.Хүүхэнбаатар, Ж.Адьяа, Ш.Төрбат, нарийн бичгийн дарга Ц.Бямба-Очир  нарын   болон сумдын ИТХ-ын үе үеийн дарга, нарийн бичгийн дарга, аймаг сумын ИТХ-д төлөөлөгчөөр сонгогдож байсан нийт хүмүүст талархал илэрхийлье гэж  онцлон тэмдэглэлээ.

Хурлын үеэр Луус сумын өндөр настан Д.Галсандорж, Сайнцагаан сумын өндөр настан  Ш.Номхондорж нар “Хөдөлмөрийн гавьяаны улаан тугийн одон”-гоор, “Моносфарм”-ын аймаг дахь салбарын эрхлэгч М.Ганчимэг “Алтан гадас одонгоор шагнагдсаныг гардуулав. Тэрчилэн Засгийн газар, Нутгийн удирдлагын холбоо,  аймгийн Засаг даргын  болон ИТХ-ын шагналаар олон хүн шагнагдлаа.

Баярын арга хэмжээний хүрээнд спортын хэд хэдэн төрлийн тэмцээн, үндэсний бөхийн барилдаан болж хүндэтгэлийн концерт тоглов. Мөн сумдад энэ ойг өргөн тэмдэглэжээ.