“Лондон-2012” зуны олимпийн наадмын чөлөөт бөхийн төрөлд олимпийн эрх олгох сүүлийн тэмцээнд зодоглох Монголын тамирчид өнөөдөр өглөө эх орноосоо мордлоо. Финляндын Вантаа хотноо тавдугаар сарын 4-6-нд болох сонгон шалгаруулах тэмцээнээс алт, мөнгөн медаль хүртсэн тамирчдад олимпийн эрх олгох юм.

Олимпийн наадмын чөлөөт бөхийн тэмцээний хөтөлбөрт багтдаг эрэгтэйчүүдийн долоо, эмэгтэйчүүдийн дөрвөн жин байдгаас Монголын тамирчид эрэгтэйчүүдийн 74 ба 120 кг, харин эмэгтэйчүдийн дөрвөн жинд бүгдэд нь /48, 55, 63, 72 кг/ эрхээ аваад байгаа билээ. Тиймээс үлдсэн таван жинд эрхээ авч, бүтэн багаараа олимпийн дэвжээнд зодоглохоор Гавьяат тамирчин Б.Наранбаатар /55 кг/, ОУХМ Г.Мандахнаран /60 кг/, Б.Батзориг /66 кг/, О.Үйтүмэн /84 кг/, Ч.Хүдэрбулга /96 кг/ нарын тамирчид Финляндыг зорилоо. Баг тамирчдыг МЧБХ-ны дэд ерөнхийлөгч Х.Баттуул ахалж, ерөнхий дасгалжуулагчаар А.Цэдэнсодном, дасгалжуулагчаар Б.Баяраа, Б.Батбаяр нар, багийн эмчээр Ч.Насанбат нар ажиллах ажээ. Түүнчлэн олимпийн зэрэглэлийн шүүгч Б.Төмөрбаатар шүүх бүрэлдэхүүнд багтан ажиллах юм байна.