Монгол Улсын гурван оюутан ОХУ-ын Екатеринбург хотод хар тамхины хэрэгт сэжиглэгдэн энэ сарын 10-11-нд шилжих шөнө баривчлагдсан билээ. Цагдаагийн байгууллагаас тэднийг шинжилгээнд хамруулж, мансууруулах бодис хэрэглээгүй болохыг тогтоосон ч тус хотын Аюулгүй байдлын зөвлөлөөс “Засаг захиргааны хэв журам зөрчсөн” гэж үзээд ОХУ-аас албадан гаргах шийдвэр гаргасан юм. Үүнтэй холбоотойгоор тэд тус улсын  Свердловск мужийн шүүхэд гомдол гаргасан байна. Энэ сарын 26-нд эдгээр гурван Монгол оюутанд холбогдох хэргийн шүүх хурал тус орон нутгийн шүүхийн танхимд болсон байна. Оюутнуудын хэргийг шүүх ажиллагаа гурван цаг гаруй үргэлжилж шүүхээс оюутнуудыг албадан нутаг буцаах шийдвэрээ цуцалжээ.