Хятадын Чунцинь хотын Коммунист намын даргын суудлаас огцорсон Бо Силайгийн хүү Бо Гуагуа үнэтэй, спорт машинуудыг ээлжлэн унадаг гэдэг яриаг үгүйсгэсэн гэнэ. Аав нь албан тушаалаас огцорч, ээж нь Их Британийн бизнесменийн үхэлд сэжиглэгдээд буй энэ үед Бо Гуагуа шүүмжлэлийн бай болоод байгаа гэнэ. Харвардын сургуулийн төгсөх курсын оюутан тэрбээр саяхан сургуулийн нэгэн сонинд өгсөн ярилцлагадаа “Феррари” унаж байгаагүй гэжээ. Сүүлийн хоёр жилийн хугацаанд гурван удаа л торгуулсан гэх тэрбээр “Порше” унадаг гэж ярьжээ. Гэвч Массачусетс мужийн тээврийн газраас түүний нэр дээр ямар ч “Порше” машин бүртгэгдээгүй гэж мэдэгдсэн гэнэ.

Бо Силайг Хятадын Коммунист намын өндөр албан тушаалаас огцорсны дараа түүний хүүгийн хэтэрхий тансаг хэрэглээний тухай яриа газар авч, олон нийтийн зүгээс хүчтэй шүүмжлэлтэй тулгарчээ.