АНУ-ын Төрийн нарийн бичгийн дарга хатагтай Хилари Клинтон Гадаад харилцааны сайд Г.Занданшатарт ирүүлсэн захидалдаа, Монгол Улс Ардчилсан орнуудын хамтын нийгэмлэгийг амжилттай даргалж байгаад талархаж байна гээд  танай улсын явуулж буй ажиллагаа олон оронд урам дэм үзүүлж, дэмжлэг туслалцаа болж байна гэж онцлон тэмдэглэжээ Тэрбээр Ардчилсан орнуудын хамтын нийгэмлэг нь дэлхий дахинаа ардчиллыг урагшлуулахад чухал үүрэг гүйцэтгэж байгааг онцолж, АНУ нь энэ байгууллагыг амжилттай хөгжүүлэхийн төлөө байж, хамтран ажиллахаа илэрхийлсэн байна.

Хатагтай Клинтон АОХН-ийн хүрээнд хийгдэж буй шинэчлэлийн үйл явцыг дүгнэхдээ «АНУ тус байгууллагын үйл хэрэг сүүлийн хоёр жилд илтэд сэргэн мандаж байгааг харахад урамтай байна” гэжээ.

Манай улс АОХН-ийн даргын албыг өнгөрсөн жилээс хашиж байгаа бөгөөд энэ хугацаанд  түүний Удирдах зөвлөл, Гүйцэтгэх хороог үүсгэн байгуулж, саявтар Ерөнхий нарийн бичгийн даргыг сонгон томилох ажлыг амжилттай зохион байгууллаа. Эдгээр арга хэмжээ нь дэлхийн 140 шахам ардчилсан орныг эгнээндээ багтаасан энэхүү эвслийг улам бүр институц шинжтэй болгоход дорвитой алхам болж байгаа юм.