Оросын Ерөнхий сайд Владимир Путин “Оросын төмөр зам” компанид төмөр замын тээврийн тарифыг нэмэгдүүлэх зөвшөөрөл олгожээ. Өчигдөр Москвагийн Рижская төмөр замын буудалд болсон төмөр замын салбарын асуудлаархи уулзалтын үеэр “Оросын төмөр зам” компанийн тэргүүн Владимир Якунин төсөв хүрэлцэхгүй байгаагаа дуулгасны дараа Путин энэхүү мэдэгдлийг хийжээ. Урьд нь “Оросын төмөр зам” компани тээврийн тарифыг 7.4 хувиар нэмэгдүүлэхээр санал хүргүүлээд байжээ. Харин тус улсын Засгийн газар өнгөрсөн жилийн байдлаар инфляци 6.1 хувьтай байсныг үндэслэн тээврийн тарифыг энэ жил 6 хувиар нэмэгдүүлэхийг зөвшөөрчээ. Мөн Оросын төмөр зам компанид төмөр замын дэд бүтцийг сайжруулахад зориулж 1.37 тэрбум ам.долларын татаас олгохоор болжээ.

Ирэх жил ч гэсэн Оросын төмөр замын тээврийн тариф багагүй хувиар өсөх магадлалтай байна. Якунин өчигдрийн уулзалтаар төмөр замын тээврийн тарифыг 10 хувиар, хамгийн багадаа 7.4 хувиар нэмэгдүүлэх хэрэгтэй гэжээ. Эдийн засгийн хөгжлийн яамны тооцоолж буйгаар энэ жил тус улсын инфляцийн түвшин 5 хувьтай гарах төлөвтэй байна. Оросын хувьд төмөр замын тээврийн тарифын өсөлтийг инфляцийн түвшинтэй уялдуулан тооцдог ажээ.

Гэхдээ Путин төмөр замын уулзалтын үеэр Оросын төмөр зам дэд бүтцийн шинэчлэл хийх төлөвлөгөөгөө зөвхөн тээврийн тарифыг нэмэгдүүлэх замаар шийдвэрлэхийг оролдож таарахгүй. Үгүй бол бид эдийн засгийн хөгжлөө хялбархан сөнөөж орхино гэдгийг сануулжээ. Мөн тэрээр дараагийн арван жилд Оросын төмөр замын дэд бүтцийг шинэчлэхэд 5 их наяд рубль буюу 170 тэрбум ам.доллар шаардлагатайг мэдэгдсэн байна.

Оросын төмөр замын тээврийн хүчин чадлыг 2020 он гэхэд гурав дахин нэмэгдүүлэх шаардлага тулгарч магадгүй байгаа ажээ. Учир нь Ази, Номхон далайн бүсийн орнуудын эрдэс баялгийн эрэлтийг хангахад Оросын үүрэг улам бүр өссөөр байгаа юм.

Б.Төгс

www.mongolianminingjournal.com
www.journalism.mn