Улс орны хөгжлийг мэдээллийн технологи, сүүлийн үеийн дэвшилтэт техник
технологийн хэрэглээгээр нь дүгнэдэг болсон энэ үед мэдээллийн
технологи, програм хангамжийн салбар хүрээгээ тэлж, энэ чиглэлээр
суралцах оюутан залуусын тоо  ч нэмэгдсээр байна. Үүнтэй холбоотойгоор
МУИС-ийн 70 жил, Мэдээллийн Технологийн Сургуулийн (МТС) 10 жилийн ойн
хүрээнд Улсын Програмчлалын XXII олимпиад МУИС-ийн МТС дээр 2012 оны
дөрөвдүгээр сарын 28-наас 29-ний өдрүүдэд зохион байгуулагдах гэж байна.

Уг олимпиад нь мэдээллийн технологи, програм хангамжийн чиглэлээр
суралцдаг их дээд сургуулийн оюутнуудын дунд жил бүр уламжлал болгон
явагддаг бөгөөд энэ удаагийн олимпиадад 20 орчим их дээд сургуулийн 50
гаран шилдэг оюутан залуусыг хамарч өргөн хүрээнд зохиогдох гэж байна.

Уг олимпиад програмчлалын олимпиад, бүтээлийн уралдаан, ажлын байрны
үзэсгэлэн  гэсэн гурван үйл ажиллагаа явагдах бөгөөд бүтээлийн уралдаанд
амжилттай оролцож манлайлсан оюутнуудад ивээн тэтгэгч байгууллагын
нэрэмжит шагналыг олгох юм. Олимпиадын үеэр програм хангамжийн чиглэлээр
үйл ажиллагаа явуулдаг компаниудын ажлын байрыг мэргэжлийн оюутнуудад
сурталчлах, компани болон оюутныг хооронд нь холбох гүүр болох, техник
технологийн мэдээллээр хангахад чиглэгдсэн “Ажлын байрны үзэсгэлэн”-г
зохион байгуулах бөгөөд уг үзэсгэлэнд програм хангамжийн салбарын
манлайлагч 10 компани оролцож компанийхаа үйл ажиллагааг танилцуулах,
илтгэл тавих, тэмцээн уралдаан зохиох зэрэг үйл ажиллагаа явагдана.     

Дэлгэрэнгүйг ЭНД дарж үзнэ үү.