УИХ-ын чуулганы нэгдсэн хуралдаанаар өчигдөр орой Стратегийн ач холбогдол бүхий аж ахуйн нэгжид гадаадын хөрөнгө оруулалтыг зохицуулах тухай багц хуулийн төслийг хэлэлцээд гишүүдийн олонхийн саналаар “Хэлэлцэх нь зүйтэй” хэмээн үзлээ. Төсөлд зааснаар гадаадын хөрөнгө оруулагч стратегийн ач холбогдол бүхий аж ахуйн хувьцааны 25-аас доошгүй хувийг, ашигт малтмалын хайгуулын болон ашиглалтын тусгай зөвшөөрлийг эзэмшиж байгаа этгээдийн хувьцааны 15-аас дээших хувийг шууд болон шууд бусаар эзэмших хэлцэл хийх болбол заавал Монгол Улсын Засгийн газраас зөвшөөрөл авах юм. Хэрвээ зөвшөөрөл аваагүй бол хууль зөрчсөнд тооцно. Харин стратегийн ач холбогдол бүхий салбарт батлан хамгаалах, ашигт малтмал, эрчим хүч, зам тээвэр, банк, санхүү, хэвлэл мэдээллийн салбар хамаарах болж байна.

Хэлэлцүүлгийн шатанд гишүүд гадаадын хөрөнгө оруулалт Монгол Улсын хөгжилд тодорхой хэмжээгээр үр дүн дагуулж ирсэн. Цаашид ч хувь нэмэр оруулахаар байгаа. Ийм үед гадаадын хөрөнгө оруулагчид даварч байна гэж үзээд бүх зүйл дээр монголчууд өөрсдөө байна гэж тодорхойлох нь эргээд эрсдэл дагуулах вий. Асуудалд хоёр талаас нь далайцтай харахгүй бол нэг тал руу хэтэрхий туйлширсан хэрэг болно. Тэр тусмаа Засгийн газар нь ажил хийхгүй байгаа үед асуудлыг нэг тал руу туйлшруулах нь эргээд хөрш орнуудын харилцаанд сэв суулгахаар асуудлууд гарч ирж болзошгүй хэмээн сэрэмжлүүлсэн юм. Харин Гадаад харилцааны сайд Г.Занданшатар “Гадаадын хөрөнгө оруулалтыг огт хориглосон асуудал байхгүй, бас Монголд гадаадын хөрөнгө оруулалт одоо огт хэрэггүй болсон юм биш. Гагцхүү зохицуулалтгүй явж ирсэн асуудлыг зохицуулахаар төслийг санаачилж УИХ-аар хэлэлцүүлж байна гэсэн юм.

УИХ-ын чуулганы нэгдсэн хуралдаанаас Стратегийн ач холбогдол бүхий аж ахуйн нэгжид гадаадын хөрөнгө оруулалтыг зохицуулах тухай багц хуулийн төслийг дэмжсэн тул ирэх долоо хоногоос байнгын хороогоор анхны хэлэлцүүлгийг хийх болж байна.