Улсын ерөнхий прокурорын дэргэдэх Мөрдөн байцаах албаныхан өчигдөр МАХН-ын Ерөнхий нарийн бичгийн Н.Удвал болон нарийн бичгийн дарга Л.Цог нараас мэдүүлэг авчээ. МАХН-ын дарга Н.Энхбаярыг баривчлах үед Н.Удвал, Л.Цог нар хамт байсан. Тиймээс тухайн үед болсон үйл явцын талаар үнэн зөв мэдээлэл авах үүднээс тэднээс мэдүүлэг авсан аж. Энэ хэрэг явдлаас болж МАХН-ын удирдлага болон жирийн гишүүдийг хууль хяналтынхан зүгээр байлгахгүй бололтой. Нэг үгээр хэлбэл, тус намын гишүүн З.Баянсэлэнгэ, Д.Шонхоо нарын хэдэн хүнийг торгож, заримыг нь баривчилсан. Энэ мэтчилэн МАХН-ын гишүүдийг байцаах, баривчлах үйл явц хэзээ дуусах бол. Түүнчлэн Монгол Улсын Ерөнхийлөгч асан Н.Энхбаяр “twitter” ашиглаж байгаа бололтой. Өөрөө бичсэн үү, хэн нэгэн бичсэн үү. Ямартай ч өчигдөр “Алдаа гаргадаггүй хүмүүн үгүй болов уу. Гэвч ухаарч гаргасан алдаагаа давтахгүй байх нь жинхэнэ хүмүүний мөн чанар ажгуу” гэжээ.