УИХ-ын гишүүн Ч.Улааныг Авлигатай тэмцэх газраас шалгаж эхэлсэн гэх мэдээлэл цацагдах болсон. Энэ талаар УИХ-ын гишүүн Ч.Улаанаас тодруулсан юм.

-Таныг Гаалийн ерөнхий газрын дарга асан Х.Баатарын хэрэгт холбогдуулан Авлигатай тэмцэх газраас шалгаж эхэлсэн гэсэн мэдээлэл гарах боллоо. Авлигатай тэмцэх газраас танд энэ талаар ямар нэгэн байдлаар мэдэгдсэн үү?

-Энэ талаар би тодорхой мэдээлэлгүй байна. Одоогоор хуулийн байгууллагаас надад мэдэгдсэн зүйл ч алга. Энэ хэргийг хэдэн жилийн өмнө шалгаад шийдвэрлээд дууссан гэж би ойлгож байгаа. Тухайн үед би Шадар сайдаар ажиллаж байсан бөгөөд энэ  хэрэгт намайг холбоотой гэж нотлоогүй. Гэтэл одоо энэ асуудлыг дахиж сөхөөд намайг холбоотой гэж байгаад гайхаж байна. Тухайн үед нотлогдоогүй юмыг одоо нотолно гэж байхгүй шүү дээ.

-УИХ-ын нэр бүхий есөн гишүүн Хууль зүй, дотоод хэргийн сайд Ц.Нямдоржийг огцруулах шаардлага тавьсан. Гэтэл тантай холбоотой ийм мэдээлэл гараад байгааг энэ бүхэнтэй холбоотой гэж та үзэж байна уу?

-Би тэгж үзэж л байна. Энэ бол зориудаар тарааж байгаа яриа гэж би хувьдаа ойлгож байгаа.

-Хэрэв Авлигатай тэмцэх газраас дээрх хэрэгтэй холбогдуулан таныг шалгах хүсэлт тавибал яах вэ?

-Үнэхээр л энэ хэрэгтэй холбогдуулан асууж лавлах зүйл байх юм бол би очиж тайлбар өгөхөд бэлэн байна.

Авлигатай тэмцэх газраас УИХ-ын гишүүн Ч.Улааныг шалгаж байгаа гэсэн мэдээллийг УИХ-ын гишүүн Ч.Улаан няцаасан. Харин Авлигатай тэмцэх газрын Тамгын газрын дарга Ч.Өнөрбаяр доорхи хариултыг өгсөн юм.
 
-УИХ-ын гишүүн Ч.Улаа­ныг Гаа­лийн ерөн­хий газрын дарга асан Х.Баатарын хэрэгт холбог­дуулан шалгаж эхэл­сэн гэсэн. Энэ үнэн үү?

-Албан ёсоор шалгаж эхэлсэн зүйл байхгүй бай­на. Хэвлэл мэ­дээллийн хэ­рэгслээр тийм мэдээлэл гар­сан байна билээ. Гэх­дээ хуу­лийн хувьд УИХ-ын гишүүн Ч.Улааныг энэ хэрэгт холбогдуулан шалгах үндэслэл бий.

-Ямар учраас тэр вэ?

-Энэ тухай иргэдээс гомдол ирүүлж, асуудал дахин сөхөгдөөд ирвэл шалгах бүрэн боломжтой юм.