Бүс нутгуудад шатахууны  үнэ оны эхэн үеийнхтэй харьцуулахад нэлээд буурсан тухай Газрын тосны газраас мэдээлжээ. Тухайлбал, баруун бүсэд А-80 шатахууны үнэ энэ оны эхэн үетэй харьцуулахад 166 төгрөг, хангайн бүсэд 170 төгрөг, төвийн бүсэд 129 төгрөг, зүүн бүсэд 190 төгрөгөөр буурсан байна.

Харин А-92 шатахуун орон нутагт 150-280 төгрөгөөр буурчээ. Тухайлбал, Баян-Өлгий аймагт А-92 шатахуун литр тутамдаа 150 төгрөгөөр багассан бол Завхан, Орхон аймагт 280 төгрөгөөр хямдарсан байна. Өнгөрсөн нэгдүгээр сарын 6-наас нефть импортлогч компаниуд шатахууны литр тутмынх нь үнийг 235-260 төгрөгөөр нэмсэн билээ. Тухайн үед үнийн өсөлтийг ам.долларын ханш чангарсантай холбон тайлбарлаж байсан ч түүнээс хойш шатахууны үнийг шат дараатай бууруулсан  байна.