УИХ-ын ээлжит сонгууль болоход хоёр сар хүрэхгүй хугацаа үлдсэн. Тий­мээс энэ сарын 30-нд УИХ-ын сон­гуу­лийн санал авах тов гарч, иргэд хэр­хэн са­нал өгөх, сонгуулийг яаж явуулах ту­хай асууд­лууд шийдвэрлэгдэх учиртай юм. Сонгуулийн ерөнхий хорооноос УИХ-д сонгуулийн товыг хүргүүлсэн байна. УИХ-ын сонгуулийг зургадугаар сарын 28-нд зохион байгуулах саналыг энэ сарын 19-нд  өргөн барьсан байна. Сонгуулийн тухай хуулийн 8.2-т заас­наар “Ээлжит сонгуулийн санал авах өдөр нь сонгуулийн жилийн зурга­дугаар сарын сүүлийн долоо хоногийн аль нэг ажлын өдөр байна” гэж заас­ны дагуу зургадугаар сарын 28 буюу пү­рэв гаригт зохион байгуулах хүсэлтийг тавьсан гэв. Харин гадаадад байгаа иргэ­дийн саналыг тухайн улсад суу­гаа Консулын газраар дамжуулан зурга­дугаар сарын 10-нд зохион байгуулах гэнэ. Сонгуулийн ерөнхий хорооноос гаргасан дүнгээр энэ жил 1.834.461 ир­гэн УИХ-ын сонгууль өгөх юм байна. Харин тойргийн хороо 26, салбар хо­роо 340, хэсгийн хороо 1950, нийт гишүү­дийн тоо 10 мянга 50 хүн байхаар төлөв­лөсөн аж.

УИХ-ын сонгуулийн тухай хуу­линд автоматаар санал хурааж зо­хион байгуулна гэсэн байгаа учраас мэ­дээл­лийн технологийн 26 баг, 1950 даа­мал, 2080 энэ чиглэлийн ажилчин бай­хаар тусгаж нийт 16 тэрбум 824 сая төгрөг зарцуулах тооцоог гаргаад байгаа юм байна. СЕХ саналаа УИХ-д өргөн барьсан байгаа бөгөөд нэгдсэн чуулганаар энэ асуудлыг хэлэлцэх учиртай. Гэтэл УИХ сонгуулийн тухай хуулийг хэрхэн явуулах тал дээр одоо­гоор тодорхой шийдэлд хүрээгүй байгаа учраас Сонгуулийн ерөнхий хорооноос өгсөн саналыг хэзээ шийдвэрлэх нь тодорхойгүй байгаа юм.

Сонгуулийн тухай хуулинд сонгуу­лийн санал авах өдрөөс 60 хоногийн өмнө УИХ-ын сонгуулийн товыг зарлана гэсэн байдаг. Зургадугаар сарын сүүлийн өдөр буюу мөн сарын 29-ний өдрөөр тооцоод үзвэл энэ сарын 29-ний өдөр сонгуулийн товыг зарлах ёстой юм байна. Тиймээс энэ долоо хоногт УИХ-ын нэгдсэн чуулганаар СЕХ-ны саналыг хэлэлцэх учиртай.

Мөн УИХ-ын сонгуульд оролцох намууд сонгуульд нэр дэвших мөрийн хөтөлбөр болон гишүүдийн нэрсээ тодруулах ёстой. МАН-ын хувьд Бага хурлаа ирэх тавдугаар сарын 1-нд хийхээр товложээ. Бага хурлаар УИХ-ын 2012 оны сонгуульд МАН-аас нэр дэвшүүлэх мөрийн хөтөлбөрөө хэлэлцэх юм байна. Гэхдээ тус намынхан 2012 оны УИХ-ын сонгуульд дэлгэх гол хөзрүүдээ бэлэн болгосон гэж хэлж болно. Энэ нь өнгөрсөн өвөл МАН-ынхан Бага хурлаа хийхдээ Мон­гол Улсын хөгжлийн бодлогыг төлөвлөсөн бүхэл бүтэн 20 жилийн хөтөлбөрийг баталсан юм. Түүгээр бол Монгол Улс уул уурхайг түшиглэн хөгжинө, уул уурхайгаас олсон орлогоо аж үйлдвэрийг хөгжүүлэх чиглэлд зарцуулна. Мөн хүний хөгжилд онцгой анхаарал тавина гэж МАН-ын дарга, Ерөнхий сайд С.Батболд зарлаж байлаа. Мөн 20 жилийн дараа Монгол Улсын нэг хүнд ногдох ДНБ 60 мянган ам.долларт хүрнэ гэсэн судалгааг энэхүү хөгжлийн хөтөлбөрийг боловсруулах шатанд гадаад, дотоодын эрдэмтэн судлаачдын судалгаанд үндэслэн баталгаажуулсан гэдгээ мэдэгдсэн билээ.

Харин Ардчилсан намын хувьд ҮЗХ-ны хурлаа хэзээ хийх нь одоогоор тодорхойгүй байгаа юм байна.