Европын
хөлбөмбөгийн холбооны хамгийн нэр хүндтэй тэмцээн Аваргуудын лигийн
хагас шигшээд учраа таарсан Английн "Челси" болон Испанийн "Барселона"
багийн хариу тоглолт "Кэмп ноу" цэнгэлдэхэд дөнгөж сая өндөрлөж, талбайн
зочин "Лондонгийн цэнхрүүд" финалд өрсөлдөх эрхтэй боллоо. Өнгөрсөн
долоо хоногт "Стэмфорд Бриж"-д болсон эхний тоглолтод талбайдаа 1:0-ээр
ялалт байгуулаад байсан "Челси"-гийн хувьд өрсөлдөгчийнхөө талбайд 2:1
харьцаатай хожигдоход л аваргын төлөө өрсөлдөх эрхтэй болох байсан.
Улмаар тоглолт 2:2 харьцаатай өндөрлөж, "Челси" хоёр тоглолтын
нийлбэрээр 3:2 харьцаатай ялалт байгуулж, Европын топ төвшний өрсөлдөөнд
эцсийн шатанд шалгарлаа. Тоглолтын туршид "Барса"-гаас Серхио Бускетс
/35`/, Андрес Иньеста /43`/ нар гоолдсон бол "Челси"-гээс Рамирес эхний
үеийн нэмэлт цагт /45+1`/ гоолдож, финалд хөтлөх эхний гоолыг оруулсан.
Хүн дутуу "Челси"-гийн хамгаалалт дор үргэлжилсэн тоглолтын хоёрдугаар
хагас өндөрлөх мөчид, сэлгээгээр талбайд гарсан Фернандо Торрес шүүгчийн
мэдлийн нэмэлт цагт /90+2`/ хаалгачийн эсрэг ганцаараа гарч,
гоолдсоноор тоглолтын цэгийг тавьсан.