Дархан–Уул аймгийн МХГ-ын Боловсрол, соёл, шинжлэх ухааны хяналтын улсын байцаагч Дархан хотын төв мүзейд шалгалт хийв. Шалгалтаар музей зориулалтын байргүйн улмаас зарим  үнэт сан хөмрөг гэмтэж эрсдэлд орж байгааг тогтоожээ.

Тус музей нь 1970 онд 500 гаруй үзмэр бүхий “Найрамдал музей ” нэртэйгээр анх байгуулагдаж хожим нь 1994 онд үйл ажиллагааг нь өргөтгөж, үзмэрийн дөрвөн танхимтай болсон. Шалгалтын явцад илэрсэн 26 зөрчлийн 11 нь буюу 42.3 хувийг газар дээр нь арилгаж, 15 зөрчил буюу 57.7 хувийг засуулахаар хугацаатай албан шаардлага өгчээ.

Байгуулагдсанаасаа хойш 40 гаруй жил болсон тус музейн сан хөмрөгийн бүртгэл, хадгалалт хамгаалалтыг хяналтын хуудсаар шалгахад 37.7 хувь дунд эрсдэлтэй гэж дүгнэгджээ. Соёлын өвийг хамгаалах тухай  Монгол Улсын  стандартын  хэрэгжилт 62.1 хувь буюу өмнөх оныхоос 5.8 хувиар өссөн үзүүлэлт гарчээ. Түүнчлэн музейн сан хөмрөгийг хулгайд алдаж цагдаагийн байгууллагаар шалгаруулсан ч хэргийн бүрэлдэхүүнгүй гээд хэрэгсэхгүй болгож байжээ. Энэ мэтээр музей зориулалтын байргүй, харуул хамгаалалт сул зэргээс үүдэн сан хөмрөг устаж үгүй болох аюул нүүрлэж байна хэмээн үзжээ.

Соёлын өвийг хамгаалах тухай хуульд “Түүх соёлын түүхийн дурсгалт зүйлийн хадгалалт, хамгаалалтад тухайн аймаг, нийслэлийн Засаг дарга хяналт тавина” гэж заасан. Мөн Монгол Улсын стандартын 7 дугаар зүйлд “Сан хөмрөгийг даатгалд хамруулна” гэсэн заалтуудын хэрэгжилт хангалтгүй байгааг тогтоосон байна. Цаашид тус музей сан хөмрөгөө даатгалд хамруулахад шаардагдах эх үүсвэрийг шийдвэрлүүлэх хүсэлтээ гаргажээ.