Улсын дуурь, бүжгийн эрдмийн театрт өнөөдөр 19.00 цагт төгөлдөр хуурч С.Саянцэцэгийн шавь, төгөлдөр хуурч Б.Оюунгэрэл болон Li Guo Chao (БНХАУ) нар хамтарсан "Grand Evening of Piano" тоглолт болно.

Тус тоглолтыг төгөлдөр хуурч Б.Оюунгэрэл гурав дахь жилдээ зохион байгуулж байгаа бөгөөд анх 2007, 2008 онд УДБЭТ-т тус театрын симфони найрал хөгжимчидтэй хамтран хийж байсан юм.  Б.Оюунгэрэл нь 2009 онд Испанийн  Уэска хотноо болдог олон улсын төгөлдөр хуурчдын VII тэмцээнд төгөлдөр хуурч С.Саянцэцэгийн удирдлага дор оролцож, тусгай байр эзлэн, Испанийн гурван хотод дөрвөн удаагийн тоглолт хийж байжээ.

Li Guo Chao нь  1999 оноос хойш төгөлдөр хуурч С.Саянцэцэг багш дээр суралцахын хажуугаар БНХАУ-д хөгжмийн их сургуулийг төгссөн байна. Тэрбээр Франц, Испани олон улсын төгөлдөр хуурчдын тэмцээн, БНХАУ-ын CCTV-ийн болон “Kawai Cup” төгөлдөр хуурчдын тэмцээн, мөн Сингапурын залуу төгөлдөр хуурчдын тэмцээнд тэргүүн байр эзэлж байсан уран бүтээлч юм.