Дуу хуурын нутаг Дундговь аймгийн төв Мандалговьд Төв халхын дуулалт жүжгийн театрын шав тавих ёслол болоо.  Хоёр жилд багтаан, 6,5 тэр бум төгрөгийн төсвөөр  барих энэ театр нь  ер гаруй метр урт, тавиад метр өргөн талбайг эзлэх бөгөөд өндрөөшөө орон сууцны найман давхар барилгатай дүйхүйц аварга том байгууламж  юм. Дөчин баганатай, барилгын нүүрэн тал нилдээ шил, дотроо дөч гаруй танхим, өрөө тасалгаа бүхий энэ барилгын их танхим гэхэд 850 хүний суудалтай.  Мэргэжлийн урлагийн байгууллагын зориулалтаар ийм том барилга Соёлын төв өргөөг эс тооцвол манай улсад өнөө хэр баригдаагүй байгааг уул барилгыг барих тендрт шалгарсан Барилга, барилгын материалын үйлдвэрлэлийн “Суурь” компаны захирал Хорлоо энд үг хэлсэн үгэндээ  онцолж байлаа. 

    Тус аймгийн урлаг соёлын анхны байгууллага нь далан жилийн тэртээ “Улаан гэр” нэртэйгээр анхны гал голомдоо бадрааж байсан бол өнөөдөр Төв халхын дуулалт жүжгийн театр  болон өргөжиж “Дуу хуурын нутаг” гэсэн брендийн алдар сууг өргөсөн мэргэжлийн урлагийн томоохон байгууллага болсныг аймгийн Засаг дарга Д.Чандмань энэ ёслолыг нээж хэлсэн үгэндээ онцлон тэмдэглэлээ. 

Мөн далан жилийн тэртээ  арван ханатай гэрийг аймагтаа “Улаан гэр” нээхэд бэлэглэж байсан алдарт уртын дуучин П.Ширчинжунай агсны гэргий Буянравжих өнөө ер гаруй насыг зооглосон ч хүрэлцэн ирж бэлгэ дэмбэрэлтэй үг хэлж шинэ барилгын сууринд идээ цагааны дээжээ өргөн хүндэтгэл үзүүлж  Соёлын тэргүүний ажилтан, ерөөлч магтаалч Цэрэнчимэд  урлагтай амьдралаа холбох анхны гараагаа эхэлсэн  уугуул байгууллагынхаа шинэ барилгын шав  тавих ёслолд зориулан ерөөл айлдлаа. Энэхүү ёсмлолын  үеэр урлаг соёлын ажилтнуудын сүрлэг сайхан жагсаал, урлагийн тоглолт, үдшийн цэнгүүн, ёслолын буудлага боллоо.