Үндэсний хөгжил, шинэтгэлийн хороо болон “Мерси Корпс” олон улсын байгууллага хамтран “Инновацийн ваучер” туршилтын хөтөлбөрийг хэрэгжүүлж байна. Уг хөтөлбөрийг гуравдугаар сараас эхлэн хэрэгжүүлж байгаа бөгөөд хөтөлбөрт хамрагдах нийт 50 төслийн танилцуулгыг 15 аймгаас хүлээн авчээ. Үүнээс 15 төслийн танилцуулгыг зохион байгуулагчдын зүгээс шалгаруулж, тэдгээрийн дэлгэрэнгүй төслийг энэ долоо хоногт багтаан хүлээж авах гэнэ. Эцсийн байдлаар тэнцсэн төслүүдийг хөтөлбөрт зориулсан 60 мянган ам.долларын сантай ваучераар дэмжих ажээ. 

“Инновацийн ваучер” хөтөлбөр нь жижиг, дунд бизнес эрхлэгчдийг дэмжих, ялангуяа бизнесийн шинэлэг санааг хэрэгжүүлэхэд дэмжлэг үзүүлэх зорилготой ажээ. Ингэхдээ судалгаа шинжилгээний байгууллагуудтай хамтран ажиллах гарцыг нээх гэнэ.Тодруулбал, бизнесийнхээ технологийн шийдлийг боловсруулах, технологи дамжуулах, шинэ бүтээгдэхүүнээ судалж турших зэрэг тулгамдсан асуудлаа шийдвэрлэхэд шаардлагатай шинэлэг арга шийдлүүдийг боловсруулахад эрдэм шинжилгээний хүрээлэн, их сургууль, лабораториудын  туслалцаа авахад олгогдож буй тодорхой үнийн дүн бүхий эрхийн бичиг  юм байна.