Оюутолгой төслийг хэрэгжүүлэгч “Айвенхоу Майнз” компанийн гүй­цэтгэх захирал Роберт Фрийдланд албан тушаалаасаа огцорчээ. Ин­гэх­дээ удирдлагын үүргээ компанийн 51 хувийн хувьцааг эзэмшигч “Рио Тинто” компанид шилжүүлсэн бай­на. Оюутолгойн стратегийн ордыг илрүүлсэн тэр цагаас хойш Роберт Фрийдланд гэх нэр монголчуудад хэдийнэ танил болсон. Канад, АНУ-ын давхар иргэншилтэй энэ эр Америкт амьдардаггүй 40 тэр­­бумт­ны тоонд бичигддэг юм билээ. Түүний хувьд тэрбумтнуудын тоонд бичигдэх болсон нь уул уур­хай, ашигт малтмалтай салшгүй холбоотой. Тэрбээр анх “Галактик Ресурс” компанийг эзэмшсэнээр уул уурхайн салбартай холбогджээ. Гэхдээ түүний эрхэлсэн ажил бага­гүй хэл ам дагуулдаг. Үүнээсээ болж Р.Фрийдланд “Хорт Боб” хэмээх хочтой болсон аж. Түүнчлэн Канадад уул уурхайг эрхлэн явуулс­наас болж 10 гаруй гол мөрний урсацад сөргөөр нөлөөлсөн гэдэг. Мөн Замби, төв Африк зэрэг улсад хайгуул хийн ашигт малтмал ол­борлож, Амазонкоос болор, алмааз зэрэг үнэт чулууны орд газрыг нээж байсан удаатай. Энэмэтчилэн ашигт малтмалтай улс оронд ажиллаж явсаар хэдэн жилийн өмнөх нэгэн өдөр Монголын Оюутолгойг олж харсан нэгэн. Ямартай ч тэрбээр одоо Оюутолгойг орхиж, “Ivanplat” хэ­мээх компанидаа ажиллахаар бол­жээ. Харин түүний энэхүү компани нь Лондонгийн Хөрөнгийн бирж дээр IPO хийхээр зэхэж байгаа аж. Ийнхүү Монголын уул уурхайн сал­барын “тоглоом”-оос “Хорт Боб” гарлаа. Гэхдээ түүнийг Монголд да­хин ирэх, ирэхгүйг хэн ч таашгүй.