Өмгөөлөгчдийг үйлчлүүлэгчид­тэй­гээ уул­захыг нь хориглож, ажлаа хийх боломжийг нь хааж, бүр баривчилж байна. Яваандаа энэ нь бүр жишиг болж тогтох янзтай. Хүмүүс эхэндээ “Тэднийг бас ингэдэг юм уу” гэж гайхаж байлаа. Гэтэл сүүлдээ дөжирч, тоохоо ч болих нь.

Н.Энхбаярын өмгөөлөгч О.Баа­сан­хүүг Авлигатай тэмцэх газ­раас дуудаж гэнэ. Тэгээд түүнд “Н.Энхбаярыг өмгөөлөх эрхгүй” гэд­гийг нь уламжилжээ. Учир ийм тул О.Баасанхүү экс Ерөнхийлөгчийн хэрэгт холбоотой Эрүүгийн байцаан шийтгэх ажиллагаанд оролцохгүй, хорих анги руу нэвтрэхгүй. Үүнтэй холбоотой албан бичгийг Авлигатай тэмцэх газрынхан Шүүхийн шийдвэр гүйцэтгэлийн ерөнхий газарт хүр­гүүлжээ. Шалтгаан нь тун энгийн. О.Баасанхүүгийн үйлчлүүлэгчтэйгээ байгуулсан гэрээ нь Эрүүгийн байцаан шийтгэх хуульд хамаарахгүй гэх. Гэтэл О.Баасанхүүгийн ярьснаар бол тэрбээр уг нь Авлигатай тэмцэх газраас зөвшөөрлийн бичгийг нь авсан юм байж л дээ. Нэг ий­мэр­хүү толгой эргүүлсэн асуудал Н.Энхбаярын өмгөөлөгчийг тойрон эргэлдэж байна. Цагдаагийн экс дарга нарын хувьд өмгөөлөгчтэй болох аз дутав. Уг  нь Сүхбаатар дүүргийн шүүхээс тэдэнд зориулан хэдэн өмгөөлөгч томилж өгсөн юм байх. Гэвч гурав хоногийн дотор өчнөөн олон хавтаст хэрэгтэй танилцаж, хоорондоо санал солилцож, энэ хэргийг нэвтэрхий мэддэг болж чадахгүй гэдгээ тэдгээр өмгөөлөгчид шүүхэд тайлбарласан байна. Тэд үйлчлүүлэгчдийнхээ байр суурийг хамгаалж чадахгүй гэдгээ мэдэж байлаа.

Тиймээс цагдаагийн экс дарга нарыг өмгөөлөхөөс тат­галзав. Тэр ч байтугай эсэргүүцэл илэрхийлж Нийслэлийн шүүхэд мэ­дэгдэл хүр­­гүүлсэн байна. Үр дүнд нь цаг­даа­гийн экс дарга нарын шүүх хурал хойшиллоо. Ийм явдал болох нь илэрхий байхад яагаад сүржигнээд байсныг ойлгохгүй юм. Эсвэл өм­гөөлөгч нарын ажлыг иймэрхүү за­маар хааж боож кайф авдаг болоо юу.

Долоодугаар сарын 1-ний үй­мээнтэй холбоотой шүүх ху­рал Н.Энх­баярын дуулианд да­рагд­чихсан болохоос биш олны анхаарлын төвд байсан юм шүү. Тухайн үеийн Ерөнхийлөгч, Ерөн­хий сайд, УИХ-ын дарга, Хууль зүй, дотоод хэргийн сайд нарыг шүүх танхимд гэрчээр авчруулж чадсан шүүх хурал эцсийн шийдэлд хүрч чадалгүй хойшилсон билээ. Цагдан хорих 461 дүгээр ангид болсон цагдаагийн экс дарга нарын шүүх хурлыг орхин гарсан өмгөөлөгч О.Алтангэрэлийг тэр үед баривчилсан. Шүүх хурлыг хойшлуулах хүсэлт гаргасан бо­ловч түүнийг нь хүлээж аваагүй шүүгчид бухимдсан О.Алтангэрэл үйлчлүүлэгчдээсээ татгалзсан нь ийнхүү хоригдох шалтгаан болжээ. Сүхбаатар дүүргийн шүүхээс түү­нийг Захиргааны хариуцлагын ту­­хай хуулийн 30 дугаар зүйлд заа­сан үндэслэлээр баривчилсан гэх тайлбарыг өгсөн юм. Тэрхүү 30 дугаар зүйлд “Шүүгдэгч, гэрч, хохирогч, нэхэмжлэгч, хариуцагч, шинжээч,орчуулагч болон шүүн таслах ажиллагаа хэрэгжүүлэхтэй холбогдуулан шүүхэд дуудагдсан этгээд хүрэлцэн ирэхээс зориуд зайлсхийх болон тогтоосон журам илтэд үл хүндэтгэсэн бол 5000-25000 төгрөгөөр торгох, эсхүл 7-14 хоногийн хугацаагаар баривчлах шийтгэл ногдуулна” хэмээн заасан байдаг аж. Ерөнхийдөө шүүх, про­курорыг үл хүндэтгэж, шүүх ажил­лагааны явцад санаатайгаар саад учруулсан гэх гээд байна. Тийм учраас Ч.Амарболд генералын өм­гөөлөгч О.Алтангэрэлийг 14 хоног хорихоор болов.

Нийслэлийн цагдаагийн газрын Хэв журмын хэлтсийн дарга асан, дэд хурандаа Г.Ганбаатарын өм­гөөлөгч Т.Мөнхдэлгэрийг мөн л баривчилсан. Сүхбаатар дүүргийн шүүхийн ерөн­хий шүүгч С.Соёмбо-Эрдэнэ ийм шийдвэр гаргажээ. Шалтгаан нь О.Алтангэрэлийнхтэй ижил. “Шүүх хурлын үеэр шүүхийг үл хүндэтгэсэн. Шүүх хуралдааныг санаатай хаяж гарсан” гэж. Уг нь Т.Мөнхдэлгэр Г.Ган­баатарын өм­гөөлөгч болсноос хойш ердөө тав­хан хоногийн да­раа шүүх ху­ралд оролцохоор бол­сон. Таван хоног гэдэг нь 29 хав­таст хэргийг “өөриймшүүлэх”-д хангалтгүй ху­га­цаа. Ингээд шүүх хурлыг хойш­луулах хүсэлт тавьсан ч түүнийг нь хүлээж аваагүй учир Т.Мөнхдэлгэр үйлчлүүлэгчдээсээ тат­галзаж, О.Алтангэрэлийн араас мөр дагав. Ингэж яв­саар Нийслэлийн цагдаа­гийн газ­рын харьяа Албадан саа­туулах, баривчлах төв байранд очиход хүрсэн. Бүр нэг өрөөнд орсон гэж байгаа. Юу л болоод байна даа.