З.Буяннэмэх гэж мундаг залуу байна. Тэр улаан га­­раараа гэмт этгээдтэй үзэлцэж, 216 хү­ний амь насыг аварлаа. Тайландаас Хонконг руу нисч яваа он­гоцыг унагаах үүрэг ав­сан Филиппиний амиа зо­лиослогчийн урьдаас сай­тар бэлтгэж, төлөвлөсөн ажил­лагааг Монгол залуу нэг дайраад л бусниулж орхив. Ингээд манай З.Буяннэмэх ганцаараа хэрнээ 216 хүнийг аварсан байгаа юм. Одоо цөмөөрөө З.Буяннэмэхдээ баяр хүргэхийн зэрэгцээ түү­нийг багш болгоё. Профессор цол хэргэмийг нь өгье. Тэгж байгаад түүгээр цагдаа, тус­гайгийн хэдэн ажилтанд дорвитойхон шиг хичээл заалгая. Тэгэхгүй бол гэмт хэрэгтнүүдтэй тэмцэх үүрэг хүлээсэн хэд маань уруудаж, доройтож гүйцлээ, бүр. Муусайн бүтэлгүй юмнууд бараг 700-уулаа очиж байж ганц Н.Энхбаярыг арайхийж баривчлаад байхдаа ч яах вэ дээ. Ийм байж болох уу. Гэтэл З.Буяннэмэх 216 хүнийг ганцаараа авраад бай­хад энд 700-уулаа нийл­чихээд ганц хүнийг барьж чадахгүй, хөөцөлдөж тог­лоод. Тэгээд бас болоогүй. Тэд сэжигтнийг гар дээрээ өргөөд явж байтал нөгөөх нь зугтахыг оролдож, хөлөө гозолзуулсан байгаа юм. “Экс Ерөнхийлөгч Жеймс Бондын цуврал кинонд дур­тай байсан учраас ийм юм боллоо” гэж тайлбарлалтай нь биш, ямар. Гэхдээ л ичмээр явдал болсон шүү. Манай хууль сахиулагчид өөрсдөө ч бас үүнээс болж ихэд улайж, байх суух газраа олж ядаж байгаа сурагтай. Хөөрхий тэд хүмүүс л юм хойно, тэгэх нь аргагүй. Тэгээд ингэж ярьсан байгаа юм. “Бид тэнд 700-уулаа очоогүй ээ. Н.Энхбаярын гэрийн гадаа ердөө 300 хүрэхгүй цагдаа л байсан. Та нар мэдээгүй юм уу” гэж. Уг нь олон хүний нойрыг хугаслан дулаан хөнжлөөс нь босгож, айлын хашаа мануулж байхаар З.Буяннэмэх шиг ганц залууг явуулчихсан бол амар байхгүй юу. Манай баатар залуу очсон бол юун нэг битгий хэл, нэлээд хэдэн Н.Энхбаярыг бариад гараад ирэх байсан даа.