Үйлдвэрчний эвлэлийн соёлын төв ордонд өчигдөр хөл хөдөлгөөн ихтэй байлаа. Үнэндээ тус төв  үзвэр үзэх биш ажил хайж буй хүмүүсийн хөлд дарагдсан хэрэг. “Хаврын хөдөлмөрийн яармаг-2012”-ийн үеэр бэлэн ажлын байрны захиалга 12 мянгад хүрснийг албаны хүн дуулгав. Энэ тоо цаашлаад улам өснө гэж Хөдөлмөрийн төв биржийн ажилтан ярилаа. Учир нь урин дулааны цаг ирсэн болохоор уул уурхай, газар тариалан, барилгын ажил ид эхэлж, ажлын байрны захиалгууд ч ар араасаа хөвөрдөг гэсэн. “Хаврын хөдөлмөрийн яармаг-2012” үзэсгэлэнгийн гол зорилго нь ажил хайж байгаа иргэд болон ажлын байрны захиалга өгч буй албан газрыг холбох. Яармагийн нээлтэд Монгол Улсын Ерөнхий сайд С.Батболд оролцож, Засгийн газар хүнээ хөгжүүлж, ажилтай орлоготой болгохыг үйл ажиллагааныхаа тэргүүлэх чиглэлийн нэг болгон ажиллаж байгааг онцлов. Засгийн газраас төмөр зам, “100 мянган айлын орон сууц” гээд бүтээн байгуулалтын олон ажил өрнүүлж, ажлын байр олноор бий болгох, хөдөлмөр эрхлэлтийг дэмжихэд зориулах хөрөнгө оруулалтыг нэмэгдүүлэх, санхүүгийн болон мэргэжлийн сургалтын орчинг  бий болгоход анхаарч  буйгаа иргэдэд дуулгав. Энэ үеэр “Хүчит зам”, “Очир ундраа”, “Улаанбаатар такси” зэрэг компанид ажилд орсон, сургалтын төвүүдэд сонирхсон мэргэжлээрээ суралцах нэр бүхий залууст Монгол Улсын Ерөнхий сайд С.Батболд ажлын байрны батламж, сургалтын эрхийн бичгийг нь гардуулсан юм.  Дэлхийн банк, Үндэсний статистикийн хорооноос гаргасан хамгийн сүүлийн судалгаагаар манай улсад ядуурлын төвшин 2010 оныхоос есөн хувиар буурсан нь Засгийн газраас ажлын байр бий болгож, иргэдээ ажилтай, орлоготой болгохоор явуулж байгаа ажлын үр дүн гэнэ. Төрөөс цаашдаа ч ажлын байр олноор бий болгох, ажилгүйдэл, ядуурлыг бууруулах талаар багагүй анхаарал тавихаа амална лээ. Засгийн газраас өнгөрсөн жилүүдэд жижиг, дунд үйлдвэрлэл эрхлэгчдийг бодлогоор дэмжсэний үр дүнд хөдөөд ажилгүйдэл, ядуурал буурсан гэнэ.  Өнгөрсөн онд гэхэд жижиг, дунд үйлдвэрлэлийг дэмжсэнээр 70 гаруй мянган хүн шинээр, байнгын ажилтай болсон  ажээ.

“Хөдөлмөрийн яармаг-2012”-аас ажил хайж ирсэн бүсгүй хэд хэдэн газарт ажилд орохоор анкет бүртгүүлснээ ярив. Эрүүл ахуйн мэргэжилтнээр их сургууль  төгссөн тэрбээр мэргэжлийнхээ ажлыг хоёр жил хайж байгаа аж. Одоогоор мэргэжлийн бус ажил эрхэлж байгаа ч мэргэжлээрээ ажилламаар байгаагаа учирлав. Тус үзэсгэлэнд нээлттэй ажлын байрыг олон компани зарлаж. Тухайлбал, “Очир ундраа”-д барилгын инженер, сантехникч, зээлийн эдийн засагч, “Гермес-цахиур” цементийн үйлдвэрт машин механизмын инженер, технологич, “Интер” группт эдийн засагч, хүний нөөцийн, маркетингийн менежер, инженер, “Номин холдинг”-д борлуулалтын, цахилгааны менежер, хамгаалагчийн ажил сул байгаа юм байна. “Хөдөлмөрийн яармаг”-ийн нээлтийн ажиллагааны үеэр Нийгмийн хамгаалал, хөдөлмөрийн сайд Т.Ганди “Жил бүр их, дээд болон техник мэдээллийн сургуулиудын төгсөгчдийг ажил олгогч түншүүдтэй хамтарч, ажлын байраар хангах, мэдээлэл хүргэх зорилгоор хөдөлмөрийн яармагийг зохион байгуулдаг. Засгийн газраас зохиож байгаа энэ удаагийн хөдөлмөрийн яармагт 20 мянга гаруй оюутан оролцож байна. Энэ яармагийг угтаж оюутны хөдөлмөр эрхлэлтийг дэмжихээр туршилтын хөтөлбөр хэрэгжүүлсэн. Үүнд нийт 18 мянган оюутан хамрагдаж, цагийн болон түр ажлын байраар хангасан. Оюутнууд сурахын хажуугаар уг хөтөлбөрт хамрагдсанаар ажлын байран дээр гарахад шууд бэлтгэл болж байгаа юм. Тиймээс хөдөлмөрийн яармаг жилээс жилд үр дүнтэй болж байна” гэв. Энэ жил уг үзэсгэлэн яармагт хөдөө орон нутгаас аж ахуй нэгж болон оюутан залуус хүрэлцэн ирж оролцож байгаа  гэнэ.  Монгол Улсад төрийн болон хувийн нийт 71 Мэргэжлийн сургалт үйлдвэрлэлийн төвүүдэд 48134 оюутан суралцдаг аж. Харин одоогийн байдлаар нийт 10 гаруй мянган ажлын байр бэлэн байгаа бөгөөд ажил олгогчдын зүгээс тавьсан шаардлагыг ажил хайгч нь төгс хангаж чаддаггүйгээс ийнхүү сул орон тоот ажлын байр нээлттэй байгаа гэнэ лээ. Харин ажил хайж яваа 50 орчим насны эмэгтэй ихэнх ажлын байрууд нас заачихсан нь ажилд ороход багагүй бэрхшээлтэй байгаагаа ярьсан. Ажлаа хариуцлагатай, ажлын чадвартай байхад заавал нас заах хэрэгтэй гэж үү. Иргэд ажил хийх сонирхолгүй байна гэж аж ахуйн нэгжийнхэн шүүмжилж, харин иргэд ажилд  орох гэхээр нас, зүс заадгийг буруутгаж байна лээ. Гээнэдээ ч бий, гоонодоо ч бий гэгчээр хэн, хэнд нь буруу байдаг л биз дээ.