Брюссель хотноо болж байгаа хоёр хоногийн уулзалтын эхэнд НАТО-гийн гишүүн орнуудын Гадаад хэрэг, Батлан хамгаалахын сайд нар цэргийн зардал болон Афганистанаас 2014 онд цэргээ эргүүлэн татах талаар ярилцаж эхэлжээ. Афганы байдал ихээхэн хурцатмал болж байна. Өнгөрсөн ням гаригт талибууд хаврын довтолгооноо Кабул хотын байгууламжууд руу чиглүүлэв. Афганы ерөнхийлөгч Карзай үүнийг олон улсын хүчний болон тагнуулын ажиллагааны алдаа гэж нэрлэсэн байна.

Харин лхагва гаригт НАТО-гийн Ерөнхий нарийн бичгийн дарга Андерс Фог Расмуссен Афганы арми, цагдаагийн хариу ажиллагааг өндөр үнэлсэн бөгөөд тэд аюулгүй байдал, хэв журмыг сахиулах ажлыг гартаа авч чадна хэмээн хэлсэн байна. “Бид Афганы аюулгүй байдлын албаныхан мэргэжлийн өндөр чадвар гаргаж буйг харлаа. Одоо би тэдэнд итгэж байна” гэж Расмуссен хэлжээ.

Брюсселийн энэ уулзалтаар НАТО-гийн цэргийн зардлын хэмжээг багасгахын зэрэгцээ байлдааны хүчин чадварыг  хэрхэн нэмэгдүүлэх талаар ярьж байна. НАТО-гийн шинэчлэлийг ирэх сарын 20-21-ны хооронд Чикаго хотноо болох гишүүн орнуудын төр, засгийн тэргүүн нарын саммитаар батлах юм байна. “Гадаад хэргийн болон Батлан хамгаалахын сайд нар НАТО-гийн дээд хэмжээний уулзалтад бэлтгэж байна. Бид нөөц болоцоогоо хэрхэн хамтран ашиглах, ирээдүйд яаж шилдэг үр дүнг харуулах вэ гэдгээ хэлэлцэх болно” хэмээн Германы Батлан хамгаалахын сайд Томас де Мезьер хэлэв.

Сайд нар Ливийн асуудлаарх хамтын ажиллагаа болон Европын аюулыг бууруулах үүднээс эвсэлд шинэ гишүүд орох хүсэлтээ гаргаж байгаад нь сэтгэл хангалуун буйгаа илэрхийлсэн байна. НАТО Афганаас цэргээ гаргасны дараа тэнд эмх замбраагүй байдал үүсвэл дорны аюул дахин сэргэнэ хэмээн сайд нар санал нийлжээ.